ډید خبري اژانس: د افغانستان لپاره د روسیې ځانګړي استازي ویلي چې مسکو له افغانستان سره مالي مرستو ته دوام ورکوي.
د افغانستان لپاره د روسیې د ولسمشر ځانګړي استازي ضمیر کابلوف د افغانستان په اړه د مسکو د مشورتي کنفرانس له پنځمې غونډې وروسته خبریالانو ته وویل چې روسیه غواړي له افغانستان سره مالي مرستو ته دوام ورکړي.
هغه وویل: موږ به [له افغانستان سره] مالي ملاتړ وکړو. که څه هم دا زما پریکړه نه ده. دا ډول پریکړې د روسیې فدراسیون د ولسمشر او حکومت لخوا کیږي.
کابلوف زیاته کړه چې روسیه به د ملګرو ملتونو د خوړو نړیوال پروګرام له لارې هم مرسته وکړي.
هغه زیاته کړه: موږ دا کار (له افغانستان سره مالي مرستې کوو) د ملګرو ملتونو له لارې او په مستقیم او خپلواکه توګه ترسره کوو.
د هغه په وينا، په روسيه کې افغان کډوال راټول شوي او د مرستو رسولو ته چمتو دي، نو دا مرستې په بشپړ ډول توپير لري.
