ډېر ژر به د ایران ریللار له افغانستان سره وصل شي
د ایران د رېللارې اداره وايي چې له افغانستان سره به د ایران رېللار یا پټلۍ په درو اوونیو کې وصل شي.
د ایران د فیننشل تریبیون ورځپاڼې د شنبې د ورځې د راپور له مخې، د دغه هیواد د رېللارو د ادارې ريیس عباس نظري وویل«رېللار د ایران د رضوي خراسان د ختیځ ولایت د شامتیق له سرحدي ښاره د افغانستان په خاوره کې دننه ۳۰ کیلومتره غځېدلې ده.»
ټاکل شوې ده چې دا پروژه د ایران له خواف ښاره د افغانستان تر هرات ښاره پورې ورسېږي.
ایراني رسنۍ وايي، د رېللارې پاتې برخه به د ۲۰۱۸ تر مارچ میاشتې پورې بشپړه شي.
د عباس نظري په وینا دا رېللار به د افغانستان او ایران ترمنځ سوداګري راکړه ورکړه نوره هم وغوړوي.
ده وویل چې د رېلګاډي په وسیله به د کال ۵ ملیون ټنه مال د دوو هیوادونو ترمنځ تبادله شي.
همداراز د افغانستان په شمال او شمال لوېدیځ کې د ترکمنستان رېللار د افغانستان تر پولو پورې رارسېدلې او ټاکل شوې ده چې له ټولو شمالي ولایتونو تېره او تاجکستان ته ورسول شي.
حاضردمه له ازبکستان څخه ترمزارشریف ښاره پورې په غځېدلې رېللار د منځنۍ اسیا او چین مال افغانستان ته راوړل کېږي.
په راتلونکو څو کلونو کې به د افغانستان تقریباً ټول شمالي او لوېدیځ ولایتونه د رېلګاډي له ارزان او اسان ترانسپورت څخه برخمن شي.
