د دید خبري آژانس د خبر له مخې، د افغانستان لپاره د امریکا د بهرنیو چارو وزارت ځانګړي استازي د دوحې د ناستې موخه دا ګڼلې، چې افغانستان ټول شموله او منځلاري بنسټونه ولري او د ترهګرو د ځالو په ځاله بدل نه شي.
د افغانستان په چارو کې د چین ځانګړي استازي یوشیاو یونګ د دوحې د غونډې په اړه په خپل ایکس شیټ کې لیکلي چې بیجینګ له نورو ګډونوالو سره د اعتدال حکومتدارۍ، د ښځو د زده کړې او له دغه هېواد سره د لا زیاتو بشري مرستو د برابرولو غوښتنه وکړه.
يونګ ليکلي: چين پر دې ټينګار کړی، چې موږ له ملګرو ملتونو او سيمه ييزو شريکانو سره په ځانګړې توګه د افغانستان د ګاونډيو هېوادونو د بهرنيو چارو وزيرانو له غونډې او نورو پلاتفورمونو سره لا زيات کار کولو ته چمتو يو، څو له افغانستان سره د سولې، ثبات، بيارغونې او د دې هیواد مشترکه سوکالي په برخه کې همکاري زياته کړو.
د هغه په وينا، چين او د دوحې په غونډه کې زياتو ګډونوالو د ښځو د زده کړې ترڅنګ د لا زياتو بشري مرستو، اعتدال حکومتولۍ غوښتنه وکړه.
هغه زیاته کړه چې امریکا باید د افغانستان د بیارغونې، په بهر کې د شتمنیو د خلاصون او د یو اړخیز بندیزونو د لیرې کولو لومړنی مسوولیت په غاړه واخلي.
هغه خواشیني څرګنده کړه چې د دوحې غونډه له موقت حکومت سره په خبرو کې ناکامه شوه. لکه څنګه چې چین او د سیمې هېوادونه یې غوښتل.
د چین استازي څرګنده کړه: د دوحې غونډه، لکه څنګه چې د ملګرو ملتونو عمومي منشي انتونیو ګوتریش وویل، د اندیښنې ټولې مهمې برخې تر پوښښ لاندې ونیولې ترڅو ډاډ ترلاسه شي چې افغانستان د تروریستي فعالیتونو په ځاله بدل نه شي او دا هیواد هر اړخیز بنسټونه لري.
ملګرو ملتونو د فبرورۍ په ۱۸ او ۱۹ د افغانستان په اړه د ځانګړو استازو دویمه غونډه د قوي او عملي نظریاتو د تبادلې او تعامل لپاره جوړه کړه.
