دید خبري آژانس: د چین د بهرنیو چارو وزارت ویاند ویلي، هېواد یې تمه لري چې طا-لبان به د نړیوالې ټولنې د تمې د پوره کولو لپاره اوچت ګامونه پورته کړي.
د چين د بهرنيو چارو وزارت وياند ماو نينګ پرون په يوه خبري غونډه کې د طا-لبانو د تګلارې ستاينه وکړه او ويې ويل، هيله لري چې د افغانستان د خلکو ګټو ته خدمت وکړي او د نړيوالې ټولنې هيلې به پوره کړي.
د دغه وزارت ویاند د طا-لبانو د سیاستونو ستاینه کړې او ویلي یې دي چې دغه سیاستونه د اقتصادي ودې لامل شوي دي.
هغه زیاته کړه: افغانستان اوس هم له ګڼو ننګونو سره مخ دی او نړیواله ټولنه لا هم د افغانستان د موقت حکومت د حکومتدارۍ په اړه ډېرې اندېښنې لري.
د چين د بهرنيو چارو وزارت وياند څرګنده کړه: هيله لرو چې د افغانستان موقت حکومت د افغانانو د ګټو د تامينولو او د نړيوالې ټولنې د هيلو د پوره کولو په لاره کې کوټلي ګامونه پورته کړي تر څو د نړۍ د نورو برخو څخه ملاتړ، لا زيات تفاهم، اعتماد او باور ترلاسه کړي.
باید وویل شي، چې په افغانستان کې د طا-لبانو له واکمنۍ شاوخوا دوه کاله تېرېږي، خو تر اوسه هېڅ هېواد دوی په رسمیت نه دي پېژندلي.
