پوتین: ټرمپ او حکومت یې زمونږ سره د اړیکو د بیا احیا کولو لپاره هلې ځلې کوي

دید خبرې آژانس: د روسیې ولسمشر ولادیمیر پوتین ویلي چې د اوکرایني سرتېرو د ژغورلو لپاره د ډونالډ ټرمپ غوښتنې ته یې پام شوی دی.

پوتین ویلي، د امریکا د ولسمشر دا غوښتنه درک کوي، چې د اوکراین له پوځ سره باید د بشري اصولو پر بنسټ چلند وشي.

نوموړي زیاته کړې، چې که اوکرایني سرتېري خپلې وسلې کېږدي او تسلیم شي، نو د دوی ژوند او درناوی به خوندي وي.

د روسیې ولسمشر ټینګار کړی، چې د ټرمپ د غوښتنې د مؤثرې پلې کېدو لپاره د اوکراین مشرتابه باید پوځ ته امر وکړي، چې وسلې کېږدي او تسلیم شي.

په ورته وخت کې سپوتنیک خبري اژانس خبر ورکړی، چې د ناټو سازمان سرمنشي مارک روته تایید کړې، چې دغه سازمان به اوکراین ته غړیتوب ور نه کړي او اروپا او امریکا به د سولې له هوکړې وروسته له روسیې سره د اړیکو عادي کولو ته مخه کړي.