ډید خبري اژانس: د روسیې او ازبکستان مشرانو په افغانستان کې سوله او ثبات مهم لومړیتوب بللی دی.
کرملین پرون لیکلي چې دا موضوع ازبکستان ته د روسیې د ولسمشر د سفر پر مهال د ولادیمیر پوتین او شوکت میرضیایف په ګډه اعلامیه کې مطرح شوې ده.
د روسیې او ازبکستان د ولسمشرانو په ګډه اعلامیه کې راغلي: «د هېوادونو مشران په افغانستان کې سولې او ثبات ته د یوه داسې عامل په توګه لومړیتوب ورکوي چې د منځنۍ اسیا او ګاونډیو هېوادونو پر امنیت اغېز کوي».
په خبرپاڼه کې راغلي چې روسیه او ازبکستان غواړي د افغانستان د شخړې د هواري لپاره د کوټلو پایلو د ترلاسه کولو په هدف د مسکو په بڼه، د شانګهای د همکاریو سازمان او نورو میکانیزمونو په چوکاټ کې خپلې هڅې همغږې کړي.
دواړو لورو د بیلاروس، روسیې، قزاقستان، ازبکستان، افغانستان او پاکستان د ترانسپورتي دهلیز د پراختیا لپاره د کاري ډلې لومړۍ غونډه هم مثبته ارزیابي کړه.
ولادیمیر پوتین د یکشنبې په ماښام (۶ جوزا) د دوو ورځو لپاره ازبکستان ته ورسید.
