په ۱۴۰۳ کال کې؛ د افغانستان صادرات او واردات ۱۳ میلیارده ډالرو ته رسېدلي دي
دید خبرې آژانس: د اسلامی امارت د صنعت او سوداګرۍ وزارت وايي چې په ۱۴۰۳ لمریز کال کې د افغانستان صادرات یو میلیارد ۷۸۵ میلیونه ډالرو او واردات یې څه باندې ۱۱میلیارده ډالرو ته رسېدلي دي.
د یاد وزارت په کلني راپور کې راغلي دي: “له نېکه مرغه د ۱۴۰۳ لمریز کال په پای ته رسېدو سره؛ د افغانستان د سوداګرۍ حجم د ۱۴۰۲ لمریز کال په پرتله مثبت بدلونونه درلودل. دا ښيي چې د خلکو د پېرلو ځواک لوړ شوی او د سوداګرۍ بهیر په عمومي توګه مخ په ښه کېدو روان دی.”
د صنعت او سوداګرۍ وزارت د راپور له مخې؛ په ۱۴۰۳ لمریز کال کې د افغانستان ټول صادرات یو میلیارده ۷۸۵ میلیونه ډالرو او واردات یې ۱۱.۱۶۴ میلیارده ډالرو ته رسېدلي دي.
د سرچینې د معلوماتو له مخې؛ افغانستان خپل ډېری توکي پاکستان، هند، عربي متحدو اماراتو، ازبکستان، ایران، قزاقستان، چین، ترکیې، عراق او تاجکستان ته صادر کړي دي.
ویل شوي چې کرنیز محصولات لکه انځر، پومبه او ممیز لاهم د هېواد د صادراتو تر ټولو لویه برخه جوړوي؛ خو د هغو ترڅنګ د نورو تولیداتو لکه غالۍ، سرب او د قیمتي او نیمه قیمتي ډبرو صادرات هم مخ پر وده دي.
دا په داسې حال کې ده چې افغانستان خپل ډېری توکي له ایران، عربي متحدو اماراتو، پاکستان، چین، ترکمنستان، ازبیکستان، قزاقستان، روسیې، هند او مالیزیا څخه وارد کړي چې لویه برخه یې ډیزل او پټرول تېل، د نقلیه وسایطو قطعې، مایع ګاز، د کتان ټوکر، طبي درمل، اوړه، غوړي او وريجې دي.
