د دید آژانس د خبر له مخې، له پاکستان څخه راپورونه وايي، چې د دغه هېواد په بلوچستان ایالت کې د یوه سیاسي ګوند په دفتر کې چاودنه شوې ده.
نن چهارشنبه (۱۸ دلو) په بلوچستان کې د یوه سیاسي ګوند په دفتر کې چاودنې لږ تر لږه ۷ کسان وژلي او ۱۰ نور یې ټپیان کړي دي.
چاودنه د بلوچستان د پخوانۍ ضلعې په پي بي ۴۷ حلقه کې د خپلواک کانديد اسفنديار خان کاکړ د کمپاين په دفتر کې شوې ده.
امنیتي ځواکونو سیمه کلابنده کړې او د ژغورنې عملیات یې پیل کړي دي.
د نن ورځې چاودنه د یو لړ بریدونو په لړ کې وروستۍ ده چې د سبا له عمومي ټاکنو مخکې ټاکنیز دفترونه او نوماندان په نښه کوي.
