په هېواد کې د نوي ښوونیز کال پیل شو
دید خبرې آژانس: په هېواد کې نوی (۱۴۰۴) ښوونیز کال نن په پلازمېنه کابل کې د اماني لېسې د غونډو په تالار کې د یو شمېر حکومتي چارواکو، ښوونکو او زده کوونکو په شتون کې د یوې غونډې په ترڅ کې پیل شو.
د اسلامی امارت د ریاست الوزراء اداري مرستیال مولوي عبدالسلام حنفي په دغه غونډه کې وویل چې د پوهنې وزارت مسوولين بايد د داسې معارف جوړولو هڅه وکړي، چې د هېواد نننيو اړتياوو او غوښتنو ته ځواب ويونکی واوسي.
حنفي ډاډ ورکړ، چې د اسلامي امارت مشرتابه د پوهنې وزارت ټولو اړتياوو پوره کولو ته ژمن دی، څو جنګ ځپلی افغانستان يو متعالي او غوره معارف ولري.
هغه همدارنګه له ښوونکو څخه هم غوښتنه وکړه، چې په اسلامي او ملي روحیه د سمبال نسل روزلو په موخه لا ډېرې هڅې وکړي او زده کوونکي د بېځايه وخت تېرولو پرځای د خپلو درسونو ویلو ته وهڅوي.
په ورته وخت کې د پوهنې وزارت سرپرست مولوي حبیب الله اغا وویل چې د اسلامي نظام پر ضد د زهرجنو تبليغاتو څخه يوه خبره دا هم ده، چې ګواکې اسلامي امارت د عصري زده کړو مخالف دی، خو په وینا یې دا خبره ناسمه او له حقيقت څخه لرې ده.
نوموړي څرګنده کړه، چې عصري او ديني علوم دواړه د نن ورځې مهمه اړتيا ده؛ موږ دواړو ته ژمن يو او له هېوادوالو څخه هم غوښتنه کوو، چې د رسنيو په منفي تبليغاتو ونه غولېږي.
د پوهنې وزارت سرپرست په هېواد کې د پوهنې کیفیت لوړولو په موخه د ګړندیو هڅو خبره هم وکړه او ویې ویل چې په همدې موخه د غوره نصاب او مناسب ښوونیز چاپېریال د چمتو کولو لپاره کار روان دی.
د دغه وزارت د مقام د دفتر رئيس پوهنې وزارت د دفتر رئيس مولوي شهاب الدين ثاقب په یاده غونډه کې وویل چې د هېواد هر ګوټ ته د ښوونيزو چوپړتیاوو رسول د پوهنې وزارت له لومړيتوبونو څخه دي او په دې برخه کې د پام وړ کار هم شوی دی.
هغه زیاته کړه، چې په ښونځيو کې د پوهنې کيفيت لوړولو په موخه تېر کال ګڼ شمېر ښوونکي ارزول شوي او د هغوی د ظرفيت لوړولو په موخه ورته روزنيز پروګرامونه دایر شوي دي.
د پوهنې وزارت د نوي ښوونیز کال په مناسبت په خپره کړې اعلامیه کې لیکلي، چې تېر کال په هېواد کې نږدې ۴۴ زره مدرسو او ښوونځيو فعاليت درلود او تر ۱۰ ميليونه ډېرو طالب العلمانو او زده کوونکو ته په کې د څه باندې دوه نیم سوه زره استادانو او ښوونکو له لوري تدريس کېده.
په اعلامیه کې همدارنګه راغلي، چې تېر کال د هېواد په ټولو ولایتونو کې زر کسیزې جهادي مدرسې فعالې وې او د هېواد په ټولو ولسوالیو کې ۵۰ کسیزه لیله مدرسې رامنځته شوې دي.
هېره دې نه وي، چې د چارو ادارې لوی رئيس شيخ نورالحق انور په دغه غونډه کې وویل چې که څه هم دښمن په ټول توان سره د سړې جګړې پرمټ د اسلامي امارت د بدنامولو هڅه کوي، خو هېواد ورځ تربلې د پرمختګ په حال کې ده او دلته د سراسري امن پر ټينګښت، نشه يي توکو سره پر اغېزناکې مبارزې، د اقتصادي پروژو پر تطبيق، د بې کيفيته توکو او درملو په مخنیوي او ګڼو نورو لاسته راوړنو سترګې نه شي پټېدلی.
