په هرات کې د ۹ روغتیايي مرکزونو کارکوونکو کاري اعتصاب کړی
دید خبرې آژانس: د هېواد په لوېدیځ ولايت په هرات کې لږ تر لږه د ۹ روغتیايي مرکزونو کارکوونکو له سه شنبې ورځې راهیسې د معاشونو د نه ورکړې له امله اعتصاب کړی دی.
په دغو مرکزونو کې د غوريان ولسوالۍ روغتون، د مسلخ روغتيايي مرکز، د شينډنډ ولسوالۍ روغتون، ګذره روغتون، د رواشان روغتيايي مرکز، د سنګ کوتل روغتيايي مرکز، د تورغونډۍ روغتيايي مرکز، د هفت ګله روغتيايي مرکز او د کرخ کلينيک شامل دي.
په هرات کې باخبره سرچینې ویلي چې یو شمېر دولتي کلینیکونه هم په دغه اعتصاب کې شامل دي.
د اعتصاب کوونکو په وينا، د روغتيا د ادارې او پراختيا انستيتيوت يا «او پي اېچ اېم» چې د هرات په کلينيکونو کې د ټولو روغتيايي کارکوونکو معاشونه ورکوي، له څلورو مياشتو راهيسې د دغو کارکوونکو معاشونه نه دي ورکړي.
د روغتیا د ادارې او پراختیا انستیتیوت یوه غیر دولتي موسسه ده چې په ۲۰۱۰ کال کې په افغانستان کې تاسیس او د یوې غیر دولتي موسسې په توګه د اقتصاد په وزارت کې ثبت شوې ده.
دغه بنسټ د روغتیایی سازمانونو د ایتلاف غړیتوب هم لری، چې د افغانستان د روغتیا په برخه کې د فعالو غیردولتی موسسو لپاره د چتري موسسې په توګه فعالیت کوی.
دغه سرچینې وايي چې د طا-لبانو د اضافي غوښتنې له امله د کارکوونکو معاشونه پرې شوي دي.
د دغو روغتيايي کارکوونکو په وينا، دغې ادارې ويلي چې يوازې د روغتيايي کارکوونکو معاشونه ورکوي؛ خو د سرچينې په وينا، طا-لبانو ويلي، چې د کلينيکونو ساتونکو ته هم چې طا-لبان دي، بايد دغه اداره معاش ورکړي.
دا په داسې حال کې ده، چې افغانستان تل له روغتیايي بحران او د ډاکټرانو او روغتیايي کارکوونکو له کمښت سره مخ دی.
په تېرو درېیو کلونو کې، د ډیری روغتیایی کارمندانو معاشونه د مرستندویه موسسو لخوا ورکول کیږي.
