د دید خبري آژانس د خبر له مخې، د ریښتر په کچه ۶،۴ درجې زلزلې یو ځل بیا د هېواد لوېدیځ ولړزاوه.
د اروپا د مدیترانې د زلزلې مرکز اعلان کړی چې نن چهارشنبه (د میزان ۱۹) په افغانستان کې د ریښتر په کچه ۶،۴ درجې زلزله ثبت شوې ده.
د دغې زلزلې مرکز د هرات ښار شمال لوېدیځ ته په ۳۴ کیلومترۍ کې ۱۰ کیلومتره ژور او د هېواد دویم لوی ښار و، چې ۲۷۲ زره نفوس لري.
دا زلزله نن سهار په ۴:۱۱ دقیقو په هرات، د ایران مشهد، او د دغه هیواد په یو شمیر نورو ښارونو کې احساس شوې ده.
د زلزلې مرکز د هرات ولایت زنده جان ښار وو.
د يادونې وړ ده، چې تر دې دمه د هېواد لوېديځ څو ځلې زلزلې لړزولي او خلک هڅه کوي، چې له خاورو لاندې خپل عزيزان را وباسي.
تر اوسه د دغې زلزلې د زیانونو او تلفاتو په اړه کره معلومات نشته.
