دید خبرې آژانس: د اسلامی امارت د اطلاعاتو او کلتور وزارت د هنر او کلتور معین مولوي عتیق الله عزیزي، د قطر د موزیمونو له عمومي رئیس محمد الرمیحي او د اسلامي موزیمونو له مشرې شیخه النصر سره په قطر کې د تاریخي آثارو جوړېدونکي نړیوال نندارتون په اړه آنلاین ناسته ترسره کړه.
په دې ناسته کې د قطر د موزیمونو رئیس د تاریخي آثارو د جوېدونکي نندارتون په اړه معلومات ورکړي او غوښتنه یې کړې چې د تاریخي آثارو یوه ټولګه د دغه نندارتون لپاره ورکړي.
محمد الرمیحي ویلي دي: “موږ به د افغانستان تاریخي آثار له نړیوالو قوانین او معیارونو سره سم قطر ته انتقال کړو او د آثارو ساتنې، امنیت او ترانسپورټ لپاره به دقیق تدابیر ونیول شي.”
دغه راز د هنر او کلتور معین، د قطر استازو ته د آثارو د لېږد په اړه د همکارۍ ډاډ ورکړی او ویلي یې دي چې دا پروژه د افغانستان د فرهنګي میراثونو په ساتنه او نړۍ ته د ارزښتونو په پېژندنه کې مرسته کوي او د یاد نندارتون له لارې به د افغانستان آثار له نړیوالو کلتوري حلقو سره شریک شي چې د افغانستان د تاریخي او کلتوري ارزښتونو په برخه کې نړیواله پاملرنه راجلب کړي.
هغه زیاته کړې چې د قطر د تاریخي آثارو په نړیوال نندارتون کې د افغانستان د تاریخي آثارو شتون به د ګرځندوی صنعت ته وده ورکړي او د نړۍ له ګوت ګوت څخه خلک د افغانستان فرهنګ ته جذب کړي.
