دید خبرې آژانس: د اسلامی امارت د اقتصادي کمېسیون د تخنیکي کمېټې په نوبتي ناسته کې، له اجنډا سره سم پر وړاندې شویو موضوعاتو بحث شوی دی.
د ریاستالوزراء اقتصادي معاونیت د مطبوعاتي دفتر د معلوماتو له مخې؛ په دې ناسته کې له هراړخیز بحث وروسته، د اقتصادي کمېسیون د تخنیکي کمېټې له لوري د راغلو تعدیلاتو په نظر کې نیولو سره په صادراتو کې د ښکېلو وزارتونو او ادارو لپاره د واحد سیسټم رامنځته کولو طرحه د تائید وړ بلل شوې او د وروستۍ تصمیم نیونې په موخه اقتصادي کمېسیون ته راجع شوې ده.
ویل شوي چې د یادې طرحې له مخې به په صادراتي اسنادو کې له جعل څخه مخنیوی وشي، د صادراتو وخت او لګښت به راکم او د صادراتو د تضمین اعتبار به زیات شي او په ټوله کې د صادراتو په زیاتوالي کې به مهم رول ولري.
