دید خبرې آژانس: د افغانستان صادرات د سلواغې یا دلوې په میاشت کې د جدي میاشتې په پرتله ۱۸ ملیونه ډالره کم شوي دي.
د احصایې او معلوماتو ملي اداره وایي چې افغانستان د روان کال په سلواغې میاشت کې بېلابېلو هېوادونو ته د ۱۴۴.۲ مېلیون ډالرو په ارزښت صادرات کړي او د ۱ میلیارد او ۷۶.۱ میلیون ډالرو په ارزښت یې واردات کړي دي.
د دې ادارې ویاند وايي چې په دې موده کې د افغانستان ترټولو زیات صادرات هند، پاکستان او متحده عربي اماراتو ته شوي او ترټولو زیات واردات له ایران، چین او پاکستانه شوي دي.
د دې ادارې شمېرې ښيي چې د افغانستان صادرات د تېرې میاشتې پرتله کم شوي دي.
د احصایې او معلوماتو د ملي ادارې ویاند، حلیم رافع په دې اړه وايي: “شمیرې ښیي چې د روان کال د سلواغې میاشت کې ۱۴۴.۲ میلیونه ډالر صادرات او ۱۶۷.۱ میلیونه ډالر واردات ثبت شوي، چې د تېرې میاشتې پرتله کمښت ښیي.”
بلخوا، د سوداګرۍ او پانګونې او کرنې او مالدارۍ خونې، په نړیوالو بازارونو کې د افغانستان د کرنیزو محصولاتو اهمیت ته په پام سره، د افغانستان د صادراتو د زیاتېدو لپاره کروندګرو ته د اسانتیاوو پر رامنځته کېدو ټینګار کوي.
د سوداګرۍ او پانګونې خونې ویاند، جان اقا نوید بیا وايي: دوهاړخیز تړونونه باید لاسلیک شي څو وکولای شو خپل محصولات صادر کړو او د افغانستان له لارې د نورو هېوادونو لپاره د ټرانزیټ لاره هم برابره کړو.”
د کرنې او مالدارۍ خونې لومړی مرستیال، میرویس حاجي زاده هم څرګندوي چې: “هر کال د افغانستان د وارداتو کچه څو برابره د صادراتو پرتله زیاته وي. افغانستان یو کرنیز هېواد دی او د صادراتو د زیاتوالي لپاره د کروندګرو ملاتړ ضروري دی.”
له پاکستان سره سوداګریزې ننګونې، د سوداګریزو ویزو په ترلاسه کولو کې ستونزې او د بانکونو له لارې د پیسو د لېږد په برخه کې ستونزې هغه مهم موارد دي چې د نړۍ هیوادونو ته د افغانستان د صادراتو د کمېدو لامل شوي دي.
