په تورخم کې شخړه؛ طالبان: موږ د پاکستان برید ته ځواب ورکړ
دید خبري آژانس: د افغانستان د کورنیو چارو وزارت په تورخم کې د پاکستاني او افغان پوله ساتو ځواکونو ترمنځ نښته تایید کړې او ویلي یې دي، چې «زموږ ځواکونو په تورخم کې د پاکستان د برید ځواب ورکړ».
په تورخم کې د جګړې په اړه د راپورونو تر خپرېدو وروسته، د کورنیو چارو وزارت نن چهارشنبه (۱۵ وږی) نښته تایید کړه او ویې ویل چې طا-لبانو د پاکستان له خوا د دغه برید په اړه غبرګون ښودلی دی.
په همدې حال کې ويل کيږي چې په دې جګړه کې د طا-لبانو دوه تنه غړي وژل شوي او يو پاکستاني پوځي ټپي شوى دى.
په همدې حال کې راپورونه وايي چې په دې جګړه کې څو تنه ملکي وګړي هم ټپيان شوي دي.
د سرچينې د معلوماتو له مخې، د دواړو لورو تر منځ نښته اوس پاى ته رسېدلې ده.
د افغانستان د کورنیو چارو وزارت ویاند عبدالمتین قانع پر ایکس چینل یو پیغام خپور کړی او ویلي یې دي، چې دغه نښته د ننګرهار د مومندرې ولسوالۍ په تورخم ښارګوټي کې شوې ده.
هغه دا هم وويل چې دواړه لوري له دې جګړې خبر دي او هڅه کوي چې په راتلونکي کې د دا ډول پېښو د تکرار مخه ونيسي.
د کورنیو چارو وزارت د وسله والو طا-لبانو د مرګ ژوبلې او ملکي وګړو د مرګ ژوبلې په اړه جزئیات نه دي ورکړي.
پاکستاني چارواکو تر اوسه د دې نښتې په اړه څه نه دي ویلي.
د سرچينې په وينا، تر پوځي نښتې وروسته د تورخم پوله د ترافيکو پر مخ تړل شوې ده.
په همدې حال کې د پاکستان د لومړي وزیر سرپرست انوارالحق کاکړ په دې وروستیو کې ویلي چې په افغانستان کې د امریکا له خوا پاتې شوې وسلې د پاکستان، چین، ایران او د سیمې د نورو هېوادونو پر ضد کارول کېږي.
