ډيډ خبري اژانس: په ترکيه او سوريه کې د سختو زلزلو د قربانيانو په اړه د نړيوالو سرچينو له خوا ورکړل شوې شمېرې ښيي چې په دې هېواد کې د زلزلې له امله ٨٢٠٠ کسان وژل شوي دي.
د راپورونو له مخې په ترکیه کې ۵۹۰۰ تنه او په سوریه کې ۲۳۰۰ تنه وژل شوي دي. تر اوسه په دغو دوو هېوادونو کې د څه باندې ۳۴ زره کسانو د ټپي کېدو خبر ورکړل شوی دی.
د روغتیا نړیوال سازمان اټکل کړی چې په ترکیه او سوریه کې د سترې زلزلې له امله ۲۳ میلیونه کسان اغیزمن شوي دي. دې ادارې مخکې خبرداری ورکړی و چې ښايي د قربانیانو شمېر اته برابره زیات شي.
د ترکیې ولسمشر رجب طیب اردوغان د هیواد په جنوب کې د زلزلې ځپلي ۱۰ ولایتونه د ناورین د سیمې په توګه بللي او په دغو سیمو کې یې د دریو میاشتو لپاره بیړنی حالت اعلان کړی دی.
د ترکیې ولسمشر وویل چې حکومت به زلزله ځپلو سیمو ته ۵۰ زره نور مرستندویه کارکوونکي واستوي او له زیانمنو سره د مرستې لپاره یې ۵.۳ میلیارده ډالره ځانګړي کړي دي.
د دغې زلزلې په پایله کې په ترکیه کې ۹۴۱ ودانۍ نړیدلې او په دغه هیواد کې تر اتو زرو ډیر کسان له خاورو خټو څخه ژوندي را ایستل شوي دي.
