دید خبرې آژانس: د ایران اسلامي جمهوریت د سختې ګرمۍ د دوام له امله صبا یکشنبه (د سرطان ۷) په ټول هیواد کې د رخصتۍ اعلان کړی دی.
د ایراني رسنیو د راپورونو له مخې، د سختې ګرمۍ له دوام سره سم په ټول هېواد کې ټول دولتي دفترونه او بانکونه صبا یکشنبه (د سرطان ۷مه) تړل شوي دي.
د رسنیو په راپور کې دا هم ویل شوي، چې د شنبې ورځې لپاره د ټولو دولتي ادارو کاري ساعتونه د سهار تر لسو بجو پورې ټاکل شوي دي.
په همدې حال کې د ځینو شمېرو له مخې، سږ کال به د اوړي موسم د تېرو کلونو په پرتله د نړۍ په هېوادونو کې د تودوخې له ۴ تر ۵ درجو ډېر وي.
د يادونې وړ ده چې د هوا پېژندنې نړيوال سازمان هم وايي چې د اقليمي بدلون له امله د تودوخې سختې پېښې زياتې شوې چې له ۱۹۸۰ لسيزې راهيسې شپږ برابره زياتې شوې دي.
