په ایران کې د چاودنو په اړه غبرګونونه؛ عطا محمد نور: ترهګري یو سیمه ییز او نړیوال خطر دی
دید خبري آژانس: د جمعیت اسلامي گوند مشر عطا محمد نور په ایران کې د چهارشنبې د ماښام د خونړیو چاودنو په غبرګون کې، د قربانیانو له کورنیو سره د خواخوږۍ په ترڅ کې ترهګري سیمه ییز او نړیوال خطر وباله او د هغې سره پر مبارزه ټینګار یې وکړ.
عطا محمد نور د چهارشنبې په ورځ (د جدی ۱۳مه) په کرمان ولایت کې د خونړیو چاودنو په غبرګون کې د یوه پیغام په خپرولو سره د ایران له حکومت او ملت سره خپله خواخوږي څرګنده کړه.
ښاغلي نور: «له بده مرغه خبر شوم چې د ایران په کرمان ښار کې د اسلامي انقلاب سپاه د پخواني قومندان قاسم سلیماني د شهادت د څلورم تلین په مراسمو کې د دوو چاودنو له امله لسګونه کسان شهیدان او ټپیان شوي دي».
د جمعیت اسلامي مشر د دې مطلب په دوام لیکلي چې ترهګري یو سیمه ییز او نړیوال خطر دی چې نن ورځ یې د نړۍ د اتباعو امنیت له ګواښ سره مخ کړی دی. له دې پدیدې سره مبارزه نړیوالې مبارزې ته اړتیا لري او د تروریزم ریښې باید له منځه یوړل شي، په افغانستان کې د طا-لبانو تر واک لاندې او په نورو ځایونو کې.
د یادولو وړ ده چې د ایران په کرمان ولایت کې د جنرال قاسم سلیماني د شهادت د څلورم تلین په مراسمو کې په دوو خونړیو چاودنو کې لږ تر لږه ۱۰۰ تنه وژل شوي او لسګونه نور ټپیان شوي دي.
