په افغانستان کې د چاپېريالي پروژو پر اغېزمن تطبيق خبرې وشوې
دید خبرې آژانس: د چاپېريال ساتنې ملي اداري عمومي رئيس مولوي مطيع الحق خالص، نن د ملګرو ملتو سازمان د پراختیایي پروګرام (يوانډيپي) له رئيس سټېفن سره کتلي دي.
د چاپېريال ساتنې ملي ادارې د معلوماتو له مخې؛ په دې کتنه کې د افغانستان لپاره د نړیوالو چاپېريالي اسانتياوو صندوق (جياياف) له لوري د ۹.۹۸ میلیونه ډالرو په ارزښت د تصویب شوې بودجې او له اقليمي بدلون سره د مبارزې په تړاو نړیوالو کنوانسیونونو ته د يو شمېر وړاندېز شويو پروژو په اړه خبرې شوې دي.
د چاپېریال ساتنې ملي ادارې عمومي رئیس په خپلو خبرو کې، ټينګار کړی چې هره پروژه باید په ګډه همکارۍ او همغږۍ تطبيق شي.
همدا رنګه، د ملګرو ملتو سازمان د پراختیایي پروګرام رئیس د کډ کار پر اهميت خبرې کړې او ویلي یې دي چې دغه اداره له چاپېريال ساتنې ملي ادارې سره تر ټولو ښه همغږي لري.
د کتنې په پای کې، د اقليمي بدلون او چاپېريالي پروژو د تطبیق د څرنګوالي په اړه هر اړخيزې خبرې شوې دي.
