په افغانستان کې د جوماتونو له لارې دیني پوهاي لوړول
دید خبرې آژانس: د طا-لبانو د ارشاد، حج او اوقافو وزارت وايي، اوسنیو شرایطو ته په کتو یو شمېر مشخص موضوعات د هېواد جوماتونو ته استول کېږي.
دغه وزارت زیاتوي، شرایطو ته په کتو د دغه وزارت له لوري جوماتونو کې ملاامامانو ته ځانګړي موضوعات ورکول کېږي، ترڅو ورباندې خبرې وکړي او په ټاکلو برخو کې د هېوادوالو پوهاوی زیات شي.
د ارشاد حج او اقافو وزارت مالي او اداري مرستیال، عارف الله عارف هم وايي: یانې هره ورځ چې کومه موضوع راځي، یانې د روژې پر مهال یا د حج پر وخت کې چې کومه موضوع راځي، مطابق د هماغه وخت ورته موږ موضوعات ورکوو. ځکه مسلمانانو ته هغه وخت ګټه لري چې ور په یادې وي او پر هغو عمل وکړي.
نوموړي ویلي، اوس مهال د دیني عالمانو له کمښت سره مخ نه دي؛ خو هڅه کوي چې د دیني عالمانو ظرفیت نور هم لوړ کړي.
ښاغلي عارف زیاته کړې: اوس افتاوې جوړې شوې دي چې ډېری یې د فقهې په اړه دي. افتا في الفقه چې دوی په فقه کې مهارت پیدا کړي. یانې داسې فقها وي چې په محاکمو او قضا کې وچلیږي. مطابق د شریعت احکام صادر کړي.
په همدې حال کې یو شمېر دیني عالمان د عامه پوهاوي په لوړاوي کې د منبر او دیني عالمانو رول مهم بولي.
دیني عالم، عبدالسلام متوکل هم و ویل: همدا منبرونه او جوماتونه وو چې د پیغمبر ص په وخت کې هم کورنیو چارو وزارت و، هم بهرنیو چارو وزارت و او هم یې ملتونه د دین او دنیا لور ته سوق او اداره کول. نو څرګنده ده چې منبرونه او عالمان د ټولنې په روښانتیا کې مهم رول لري.
د ارشاد، حج او اقافو وزارت دغه راز ټینګار کړی، چې دیني عالمان باید ورکړل شوي موضوعات په ساده او عام فهمه ژبه د ټولنې خلکو ته وړاندې کړي، تر څو هغوی ورڅخه په ورځني ژوند کې ګټه پورته کړي.
