دید خبرې آژانس: د سېشنبې پر سهار د غزې په بېلابېلو سیمو اسراييل پراخ هوايي بریدونه وکړل.
د اسراييل په دغو بریدونو کې څه باندې ۴۰۰ کسان و وژل شول او شاوخوا ۵۰۰ نور ټپیان دي.
د اسراييل دغو هوايي بریدونو په نړۍواله کچه غبرګونونه راپارولي دي.
د انروا په نوم د ملګرو ملتونو هغه اداره چې د فلسطیني کډوالو د حقونو برخه کې کار کوي، مشر یې، فېلېپ لزاریني پر اېکس دغې پېښې ته سخت غبرګون ښودلی او دا یې د ځمکې پر سر دوزخ بللی دی.
هغه زیاته کړې: «د جګړې بیا پېلول یوازې لا زیات کړاو او ستونزې زیاتوي او اوربند ته ستنېدل مهم دي.»
د ملګرو ملتونو د بشري حقونو عالي کمیشنر، فولکر تُرک، د اسراییلي بریدونو په اړه ویلي: «زه د تیرې شپې د اسراییلي هوایي بریدونو او بمباریو زیات ویرولی او حیران کړی یم چې د غزې د روغتیا وزارت د معلوماتو لمخې پکې سلګونه کسان وژل شوي دي.»
هغه زیاته کړه: «د تېرو ۱۸ میاشتو تاوتریخوالی ښيي چې د دغه ناورین پوځي حل نشته. یوازنۍ لار یې د نړۍوالو قوانینو پر بنسټ، سیاسي هوکړه ده. د اسراییل د لا زیاتې نظامي قوې کارول به یوازې د فلسطینیانو کړاوونه نور هم زیات کړي.»
اخوا د ایرلنډ بهرنیو چارو وزیر او مرستیال لومړي وزیر، سایمون هېرس دغه بریدونه “اندېښمنوونکي” وبلل او ویې ویل: «موږ اړتیا لرو چې دا تاوتریخوالی په دایمي بڼه پایته ورسېږي او د سولې لپاره یو روښانه لار وموندل شي.»
د ملګرو ملتونو سرمنشي، انتونیو ګوترش هم ویلي، د اسراييل دغه بریدونه بوږنوونکي دي ځکه ګڼ شمېر ملکي وګړي پکې وژل شوي دي.
د روسیې کرملین ماڼۍ هم ویلي چې دوی د اسراییل د بریدونو چې له امله یې ګڼ شمېر کسان وژل شوي اندېښنه لري.
د ایران بهرنیو چارو وزارت هم دغه بریدونه نسل وژنه بللې او زیاته کړې یې ده چې دا د امریکا په اجازه شوي.
اخوا اسراييل بیا خبرداری ورکړی چې دغه بریدونه به یې دوام وکړي او د سې شنبې ورځې بریدونه یې یوازې پیل و.
