پر بایډن د ټرمپ د نیوکو دوام
دید خبرې آژانس: په افغانستان کې د امریکا د پاتې پوځي تجهیزاتو په تړاو د ډونالډ ټرمپ نیوکې دوام لري.
د امریکا ولسمشر ډانلډ ټرمپ یو ځل بیا په سپینه ماڼۍ کې پر جو بایډن نیوکه کړې، چې له افغانستانه تر وتلو وروسته یې د امریکا نظامي تجهیزات دغلته پرېښي دي.
ټرمپ ویلي، د خپلې ولسمشرۍ پر مهال یې د امریکا پوځ په بشپړ ډول بیا رغولی و، خو بایډن د دغو تجهیزاتو یوه لویه برخه په افغانستان کې پرېښوده.
د امریکا ولسمشر، ډانلډ ټرمپ ویلي: «موږ پوځ په بشپړ ډول بیا ورغاوه، خو بیا مو ولیدل چې بایډن د دغه پوځ یوه لویه برخه افغانستان ته پرېښوده، که باور پرې کولای شئ. واقعاً هغه څه د باو وړ نه دي چې هغه وکړل. هغه زیان چې دې سړي یا دې ادارې زموږ هېواد ته واړاوه، په رښتیا د باور وړ نه دی.»
که څه هم اسلامي امارت په دې تړاو تازه څه نه دي ویلي، خو تر دې وړاندې یې د امریکا د ولسمشر څرګندونې احساساتي بللې وې.
دا څرګندونې داسې مهال کېږي، چې د پاکستان د بهرنیو چارو وزارت ویاند پرون په یوه خبري ناسته کې وویل، پاکستان د امریکا له هغو هڅو ملاتړ کوي چې غواړي خپل پوځي تجهیزات له افغانستانه بېرته واخلي.
