پاکستان کې د افغان کډوالو د نیولو بهیر چټک شوی دی
دید خبرې آژانس: پاکستان کې مېشتو ځینو افغان کډوالو یو ځل بیا د دغه هېواد له حکومته غوښتي چې د افغانانو له نیولو او جبري ستنولو ډډه وکړي.
دوی وایي، پاکستاني پولیسو له څلوېښت ورځو راهیسې اسلام اباد کې د افغان کډوالو د نیولو بهیر چټک کړی او ان ښځې او ماشومان هم ځوروي.
پاکستان کې افغان کډوال، ملک مجاهد شینواري ویلې: « په لکونو افغان کډوال در په در، خاورې په سر دي او هیڅوک یې د مسلې د حل هڅه نه کوي.»
بل افغان کډوال، نظر و ویل: « هغه افغانان چې نورو سیمو ته لېږدول کیږي او د هغوی د ویزې موده پایته رسېدلې، پولیس یې نیسي او ځوروي یې.»
له دې سره سم، د کډوالو په چارو کې د ملګرو ملتونو عالي کمېشنري په یوه راپور کې وايي، د روان زېږیز کال په تېره جنوري میاشت کې له پاکستانه شاوخوا ۱۸۳۰۰ افغانان هېواد ته ستانه شوي دي.
دغه راپور کې راغلي، چې د ۲۰۲۳ کال د سپټمبر له ۱۵مې راهیسې له پاکستانه څه باندې۸۲۵ زره افغانان راستانه شوي دي.
راپور کې راغلي: « د ۲۰۲۳ زېږیز کال د سپټمبر له ۱۵مې راهیسې څه باندې ۸۲۵ زره افغان کډوال له پاکستانه راستانه شوي. یوازې د ۲۰۲۵ کال په جنوري میاشت کې ۱۸,۳۰۰ کډوال راستانه شوي دي.»
د کډوالو د حقونو فعال، محمد خان محمدزي و ویل: « شمېرې ښیي چې له پاکستانه د افغان کډوالو د جبري ایستلو بهیر چټک شوی او د پاکستان حکومت ځینې کډوال د وهلو ټکولو له لارې دې ته اړ باسي چې دا هېواد پرېږدي.»
له دې سره هم مهاله، په ایران او ترکیه کې هم افغان کډوال له ورته ستونزو شکایت کوي.
ایران کې افغان کډوال، عنایت الله الکوزي و ویل: « افغان کډوالو څو ځلې د ایران د پولیسو له نامناسب چلنده شکایت کړی، خو له بده مرغه د دوی غږ نه دی اورېدل شوی او ستونزې یې لا هم پر ځای پاتې دي.»
د کډوالو او راستنېدونکو چارو وزارت هم وایي، جنوري کې له ایران، پاکستان او ترکیې څه باندې ۱۲ زره او ۶۰۰ کډوال هېواد ته راستانه شوي دي.
د کډوالو او راستنېدونکو چارو وزارت ویاند، عبدالمطلب حقاني و ویل: « له دې ډلې ۳۳۰ کډوال له ترکیې، ۵۷۵ کورنۍ له پاکستان، او ۲۱۸۳ کورنۍ له ایرانه هېواد ته راستنې شوې دي.»
تر دې وړاندې د کډوالو په چارو کې د ملګرو ملتونو عالي کمېشنرۍ او د کډوالۍ نړۍوال سازمان له پاکستانه غوښتي و چې د افغان کډوالو په برخه کې دې د بشري حقونو قوانین په پام کې ونیسي.
