پاکستان کابل ته د مولانا فضل الرحمن سفر شخصي بللی دی
دید خبري آژانس: د پاکستان د بهرنیو چارو وزارت اعلان کړی چې کابل ته د مولانا فضل رحمان سفر شخصي دی او دغه هیواد د پاکستاني طا-لبانو د خبرو لپاره منځګړیتوب ته اړتیا نه لري.
د پاکستان د بهرنیو چارو د وزارت ویاندې زهرا ممتاز بلوڅ ویلي چې د طا-لبانو له خوا د دغه هېواد د مشهور روحاني مولانا فضل رحمان ته د کابل د سفر بلنه نه ده معلومه.
اغلې بلوچ وویل چې د پاکستان د بهرنیو چارو وزارت له دې مسلې خبر نه دی او نه غواړي چې د «شخصي سفر» په اړه تبصره وکړي.
دا په داسې حال کې ده، چې ذبيح الله مجاهد د قوس په ٢٦مه ويلي وو، چې مولانا فضل الرحمن په پاکستان کې د «اسلامي امارت» پر ضد د منفي تبليغاتو د مخنيوي په موخه کابل ته دعوت شوی دی.
مجاهد زیاته کړه چې دوی اراده لري چې د پاکستان خلکو ته یو څه حقایق ورسوي او دغه پاکستاني عالم په دې برخه کې ښه رول لوبولی شي.
ویل کیږي چې مولانا فضل الرحمان د طا-لبانو بلنه منلې ده.
په دې وروستیو کې د پاکستاني طا-لبانو د بریدونو د زیاتیدو او په افغانستان کې دغې ډلې ته د پناه ورکولو په خاطر د اسلام اباد د چارواکو له نیوکو سره سره د افغان طا-لبانو او اسلام اباد ترمنځ اړیکې ترینګلې شوې دي.
