ډيډ خبري اژانس: د پاکستان د بهرنیو چارو وزارت ویلي، هیله لري چې طا-لبان به د وروستي ترهګریز برید په اړه چې نهه پاکستاني پوځیان په کې ووژل شول، پر خپلو ژمنو وفا وکړي.
پاکستان یو ځل بیا د اسلامي امارت له موقت حکومت غوښتي چې د تحریک طا-لبان پاکستان د هغو کسانو او سازمانونو پر ضد اقدام وکړي چې پاکستان ته ګواښ پېښوي او له پولې هاخوا په ترهګرۍ کې ښکېل دي.
د پاکستان د بهرنیو چارو د وزارت ویاندې ممتاز زهرا بلوچ له رسنیو سره په خپل اونیزه کنفرانس کې د پوښتنو په ځواب کې وویل، د افغان چارواکو لپاره مهمه ده چې د هغو اشخاصو او بنسټونو پر وړاندې اقدام وکړي چې پاکستان ته ګواښ پېښوي.
هغه وويل: دا د دوى مسووليت، نړيوال مسووليت، دوه اړخيز مسووليت او درې اړخيز مسووليت دى، لکه څنګه چې د پاکستان، افغانستان او چين په درې اړخيزه غونډه کې يې ژمنې کړي دي. نو موږ نه غواړو چې په دې اړه تبصره وکړو، مګر دا د دوی مسؤلیت دی او موږ هیله لرو چې دوی خپلې ژمنې پوره کړي.
په بنو کې د وروستي ترهګریز برید په اړه چې د راپورونو له مخې د تحریک طا-لبان پاکستان یوې بلې ډلې حافظ ګلبهادر ډلې ترسره کړی او د دې برید مسوولیت یې منلی دی، هغه وویل چې د قانون پلي کونکي چارواکي د دې پېښې جزییات شواهد راټولوي.
هغه د دې پوښتنې په ځواب کې چې ایا پاکستان اراده لري چې خپلې اندېښنې له افغانستان سره شریکې کړي، زیاته کړه: کله چې د بهرنیو چارو له وزارت څخه وغوښتل شي چې دغه معلومات او زموږ اندېښنې له افغان چارواکو سره شریکې کړي، نو موږ به یې وکړو.
