پاکستان له ا.ا سره د دوامداره خبرو اترو ټینګار کړی دی
دید خبرې آژانس: کابل ته د افغانستان لپاره د پاکستان د ځانګړي استازي له درې ورځني سفر وروسته، د پاکستان د بهرنیو چارو وزارت لومړي مرستیال اسحاق ډار، د افغانستان له سرپرست حکومت سره د دوامداره خبرو اترو پر اهمیت ټينګار کړی دی.
اسحاق ډار په هغې غونډه کې چې د پاکستان د بهرنیو چارو وزارت له لوري له افغانستان سره د اړیکو د څرنګوالي په تړاو جوړه شوې وه، د پاکستان د اندېښنو د لېرې کېدو لپاره له افغانستان سره د دوه اړخیزو اړیکو پراختیا مهمه بللې ده.
د پاکستان د بهرنیو چارو وزارت ویلي:«د لومړي وزیر مرستیال او د بهرنیو چارو وزیر د پاکستان د اندېښنو د لېرې کېدو او د دوه اړخیزو اړیکو د ښه کولو لپاره د افغانستان له لنډمهالي حکومت سره د دوامداره خبرو پر اهمیت ټینګار وکړ.»
په دې غونډه کې د افغانستان لپاره د پاکستان ځانګړي استازي محمد صادق هم کابل ته خپل وروستي سفر ته په نغوتې سره ویلي، چې د اسلامي امارت له چارواکو سره په یوه غونډه کې دواړه لوري د دوه اړخیزو همکاریو د پیاوړتیا لپاره د لوړې کچې خبرو د زیاتولو په تړاو هوکړې ته رسېدلي دي.
د پاکستان د بهرنیو چارو وزارت په دې هکله لیکلي:«ځانګړي استازي د دوه اړخیزو اړیکو د لا پیاوړتیا لپاره د ټولو اندېښمنوونکو مسایلو په ځانګړې توګه د امنیتي مسایلو د حل کولو پر اهمیت ټینګار وکړ. دواړو خواوو هوکړه وکړه، چې د دوه اړخیزو همکاریو د پیاوړتیا لپاره د لوړې کچې تعاملات او خبرې زیاتې شي.»
د پاکستان له افغانستان سره د لوړې کچې اړیکو پر زیاتولو په داسې حال کې ټينګار کوي چې د پاکستان پر ضد د افغان خاورې د کارولو په تړاو د دغه هیواد پرلپسې ادعاوو، د تورخم لارې تړل کېدو او د پکتیکا ولایت پر ځینو برخو د پاکستان هوايي بریدونو د کابل او اسلام اباد ترمنځ پر اړیکو سیوری غوړولی دی.
