دید خبرې آژانس: په پاکستان کې د ای سي سي کارت لرونکي افغان کډوال وایي ورځ تر بلې یې ستونزې زیاتیږي.
په پاکستان کې مېشت یو شمېر هغه افغانان چې، د اې، سي، سي کارټونه لري د پاکستان له لوري دوی ته د وتلو په تړاو د ورکړ شوې مودې له امله سخت اندېښمن دي.
دوی د پاکستان له حکومته غواړي چې، نور فرصت هم ورکړي.
پاکستان کې افغان کډوال، ملک اول شینواری وايي: ای سي سي کارټونو والا ناقانونه کډوال نه دي. دغه کارټونه پاکستان حکومت په خوښه دوی ته ورکړي دي. دا هغه کډوال دي چې نور کسان یې په کور کې پي او ار کارټ لري او یو کس یا دوه کسه یې ای سي سي کارټ لري. دوی دلته ۴۵ کاله کار و بار کړی دی او ژوند یې تېر شوی دی.
یو بل افغان کډوال، لعل رحمان هم وايي: زموږ هلته (افغانستان) سره هم اړیکه ده له هغه ځایه هم ډېر کسان را روان دي، کارونه نشته. یوه او بله لار باندې راځي او تکلیفونه تېروي. دا خو ډېر کم وخت دی، دې وخت کې خو ګرانه ده.
له دې سره سم، د کډوالۍ چارو ځینې فعالان وايي، د کډوالو کوربه هېوادونه باید د کډوالو په برخه کې نړۍوالو قوانینو او معیارونو ته ژمن پاتې شي.
د کډوالو د حقونو فعال، احسان خان احمدزی بیا وايي: یو اېن ایچ سي ار او پاکستان او افغان لوري ته پکار ده چې درې اړخیزه غونډه وکړي او د افغان کډوال دغه ستونزه درک شي او د دوی په اړه یوه څرګنده پالیسي جوړه شي.
د ویلو ده چې، افغان کډوال له پاکستان سربېره په ایران او ترکیې کې هم له ډېرو ستونزو سره لاس او ګرېوان دي او اسلامي امارت هم په وار وار د افغان کډوالو له کوربه هېوادونو غوښتي چې، د کډوالۍ اړوند مسایل سیاسي نه کړي او همداراز په جبري توګه یې له اېستنې هم ډډه وکړي.
