پاکستاني رسنۍ: یوه میاشت کې څه باندې ۲۶ زره افغان کډوال اېستل شوي دي
دید خبرې آژانس: پاکستاني رسنیو راپور ورکړی، چې د روان ۲۰۲۴ کال د (اکتوبر له اومې نېټې د نومبر تر پنځمې) له پاکستانه ۲۶ زره او ۴۵۰ افغان کډوال ایستل شوي دي.
ويل کیږي، د نومبر تر پنځمې نیټې د ټولو ستنو شویو افغان کډوالو شمېر ۷۹۹۲۰۸ تنو ته رسېدلی.
له پاکستانه په زور د افغان کډوالو د ایستلو لړۍ روانه ده.
د پاکستاني رسنیو د راپور له مخې، چې د دغو کډوالو له ټول شمېر څخه چې د اکتوبر له اومې نېټې څخه د نومبر تر پنځمې نیټې پورې ستانه کړل شوي له ډلې یې ۹۰۰۵ یې نارینه، ۷۱۰۵ یې ښځې او ۱۰۴۳۰ یې ماشومان وو، چې خپل هېواد ته بېرته ستانه کړل شوي دي.
راپور کې راغلي چې دغه ۲۶ زره او ۴۵۰ افغان کډوال، ۷۶۰ کورنۍ کیږي، افغانستان ته په ۷۱۰ موټرو کې ستنې شوې دي.
دغه شمېرې پاکستاني چارواکو داسې مهال خپرې کړې دي چې د افغان کډوالو د ایستلو دویم پړاو پیل شوی او دا مهال د دغه هیواد په بېلابېلو سیمو کې د افغان کډوالو نیول او ایستل روان دي.
پاکستاني چارواکو مخکې ويلي وو، که دغه کډوال په خپله خوښه ونه وځي؛ نو د دوی د نیولو او شړلو له ګواښ سره مخامخ شي.
په ملګرو ملتونو کې د پاکستان استازي منیر اکرم په تېره چنګاښ میاشت کې ويلي و، چې له تېرو ۴۰ کلونو راهیسې یې هېواد د پنځه مېلیونو افغان کډوالو کوربهتوب کړی چې ۱.۴ مېلیونه یې راجستر شوي، چې پاتې یو مېلیون نا راجستر شوي او په زرګونه بې اسناده کډوال لاهم په پاکستان کې مېشت دي.
نوموړي هیله څرګنده کړې وه، چې ۱.۴ مېلیونه راجستر شوي کډوال به هم ډېر ژر بېرته خپل هېواد ته ستانه شي.
پاکستاني چارواکو ویلي چې دغه لړۍ روانه ده او دوی په پام کې لري چې د استوګنې له اسنادو پرته افغان کډوال له پاکستانه وباسي.
ویل کیږي د افغان کډوالو یوه لویه برخه د پاکستان په لوی ښار کراچۍ کې ژوند کوي چې د پاکستاني پولیسو په وینا له پلټنو او موندلو وروسته به یې افغانستان ته ستانه کړي.
