دید خبرې آژانس: د امریکا ولسمشر په نورو هېوادونو کې د بندي امریکاییانو پر بېرته ستنونې ټینګار کړی دی.
د اسلامي امارت له بندخونې د في ډی هال په نوم د یوې امریکايي وګړې له خوشې کیدو وروسته د امریکا د بهرنیو چارو وزیر د ټولو نیول شویو امریکايي وګړو پر ورستنیدو ټینګار کړی دی.
د امریکا بهرنیو چارو وزارت ویاندې په وینا، د بهرنیو چارو وزیر د ډانلډ ټرمپ له قوله ویلي، تر هغو به خپلو هڅو ته دوام ورکړي چې په افغانستان کې نیول شوي ټول امریکایان او د نړۍ په ګوټ ګوټ کې یرغمل شوي وګړي خوشي شوي نه وي.
د امریکا د بهرنیو چارو وزارت ویانده، ټېمي بروس وايي: (د بهرنیو چارو وزیر ښاغلي روبیو په وینا، د امریکا خلکو ته د ولسمشر ټرمپ ژمنتیا روښانه ده. موږ به تر هغو آرام نه شو چې په افغانستان کې ټول نیول شوي امریکایان او په ټوله نړۍ کې یرغمل شوي، کور ته نه وي راوستل شوي.)
في ډی هال درېیمه امریکایی تبعه ده چې په قطر کې د اسلامي امارت لخوا خوشې شو.
که څه هم اسلامي امارت تر دې مهاله په دې اړه څه نه دي ویلي، خو تر دې وړاندې یې د امریکا پر وړاندې د افغانستان د ښه نیت په توګه د ریان کوربت او جورج ګلزمن په نوم دوه امریکايي بندیان خوشي کړي وو.
