دید خبرې آژانس: د امریکا ولسمشر، ډونالد ټرمپ د اوکراین په اړه د روسیې له ولسمشر ولادیمیر پوتین سره ټلیفوني خبرې کړې دي.
ټرمپ ویلي، چې پوتین د جګړې په قربانیانو ژور اندېښمن دی او غواړي چې جګړه پای ته ورسېږي او خلک د جګړې له امله مړه نه شي.
ټرمپ له نیویارک پوست سره د یوې مرکې په ترڅ کې څرګنده کړې، چې پوتین د جګړې شرایطو ته ډېر پام کوي او غواړي د جګړې په ساحه کې د مرګونو مخه ونیسي.
په دې مرکه کې ټرمپ د دې پوښتنې په ځواب کې، چې څو ځله یې پوتین سره خبرې کړې دي ویلي، چې نه غواړي په دې اړه مالومات شریک کړي.
د ټرمپ د خبرو له مخې، هغه تل له پوتین سره ښې اړیکې لرلې دي او پر خلاف د ولسمشر بایډن په اړه یې ویلي، چې بایډن د امریکا لپاره شرم و.
ټرمپ په دې مرکه کې د اوکراین د جګړې د پای ته رسولو لپاره د خپلې ځانګړې طرحې یادونه کړې.
ټرمپ د خپلو څرګندونو پر مهال د اوکراین د جګړې د سوله ییزو حل لپاره خپل ډاډ څرګند کړی او د جګړې د قربانیانو د ژوند ژغورلو لپاره یې خپلې ژمنې تکرار کړي.
روسیې د دغې ټېلفوني اړیکې په اړه څه نه دي ویلي.
