هرات کې د کوچنیو متشبثینو لپاره صنعتي ښارګوټی جوړیږي
دید خبرې آژانس: د هرات سیمهییز مسوولین وايي، په پام کې ده چې د کوچنیو صنایعو د ودې په پار کوچنیو متشبثینو لپاره یو صنعتي ښارګوټی جوړ شي.
دغه زر جریبه پراخ صنعتي ښارګوټي به د هرات ښار په لویدیځ کې جوړ شي.
د هرات د والي ویاند، محمد یوسف سعیدي و ویل: «د ځمکې سروې او ډیزاین بشپړ شوی او ټاکل شوې چې ژر د منظورۍ لپاره مرکز ته واستول شي، څو عملاً پر دې زر جریبه ځمکه کار پیل شي.»
د هرات د صنایعو او کانونو خونې د مسوولینو په خبره، سلګونه پانګوال د کوچنیو صنایعو په برخه کې پانګونې سره لېوالتیا لري.
د هرات د صنایعو او کانونو خونې مرستیال، توریالي غوثي و ویل: «کله چې زموږ پانګوال وړاندیز کوي، موږ کولای شو ژر د دوی اسناد پروسس کړو. سلګونه پانګوال ځمکې ته په تمه دي.»
ورته مهال د دغه ولایت د سوداګرۍ او پانګونې خونه وايي، د هېواد بسیاینې او پر بهرنیو توکو د اتکا کمېدو په موخه د کوچنیو صنایعو پراختیا اغېزناکه چاره ده.
د هرات د سوداګرۍ او پانګونې خونې اجراییوي امر، محمد یوسف امین و ویل: «دا ډېره اغېزمنه پروژه ده. موږ به نور د کوچنیو صنعتي محصولاتو له وارداتو خلاص شو. دغه راز، زموږ سوداګر او پانګوال به د هېواد اقتصاد او سوداګرۍ ته وده ورکړي.»
د هرات د سیمهییزو مسوولینو په خبره، په وروستیو کلونو کې دغه ولایت کې د کوچنيو صنایعو ډېری برخه د ښځو له لوري پرمخ وړل کیږي چې د پام وړ پرمختګ یې لرلی دی.
په هرات کې کوچنۍ صنایع تر ډېره په کورنیو کوچنیو کارغالو کې فعالیت کوي.