دید خبرې آژانس: د اسلامي امارت مشر ملا هبت الله آخندزاده پرون کندهار پوهنتون ته ورغلی او د پوهنتون له رهبرۍ، استادانو، کارکوونکو او محصلینو سره یې کتلي.
نوموړي په خپله وینا کې د دیني او عصري زده کړو پر ارزښت ټینګار کړی او لارښوونه یې کړې، چې محصلین باید دواړه علوم په اخلاص زده کړي او د خپل علم له لارې دین او خلکو ته ګټه ورسوي.
هبت الله آخند استادانو او محصلینو ته ویلي، چې د افغانستان شهیدان، مجاهدین او قهرمانان باید نړیوالو ته ور وپېژندل شي، ترڅو د هېواد تاریخ خوندي پاتې شي.
هغه زیاته کړې، چې اوس مهال افغانستان د اسلامي او آزاد نظام تر سیوري لاندې پرمختګ کوي او محصلین باید د خپل علم په مرسته هېواد په نړۍ کې سیال کړي.
نوموړي همداراز ټینګار کړی، چې د اسلامي امارت ټولې پرېکړې د علماوو په مشوره او د قران او احادیثو له لارښوونو سره سمې ترسره کېږي.
دا غونډه د کندهار پوهنتون په جامع جومات کې شوې، چې ګڼ شمېر محصلینو، استادانو او کارکوونکو په کې ګډون کړی و.
