م.م او جاپان د بېځایه شویو افغانانو د ملاتړ لپاره هوکړهلیک لاسلیک کړ
دید خبرې آژانس: د کډوالو په چارو کې د ملګرو ملتونو عالي کمېشنرۍ له جاپان سره د همکارۍ ۶ مېلیون ډالري هوکړهلیک لاسلیک کړ.
د دغه هوکړهلیک د لاسلیک کېدو موخه د بېځایه شویو او راستنېدونکو افغانانو له ژوندانه ملاتړ او پر ځانبسیاینه بلل شوې ده چې ټاکل شوې د هېواد په ۱۳ ولایتونو کې ۱۵ زره تنه له دغې پروژې برخمن شي.
د کډوالو په چارو کې د ملګرو ملتونو د عالي کمېشنرۍ استازی عرفات جمال په دې هکله وايي:«له جایکا سره به د دې نوې همکارۍ له لارې څه باندې ۱۵زره راستانه شوي افغانان له هغو فعالیتونو برخمن شي، چې د هغوی د ځان بسیاینې او هوساینې لپاره طرحه شوې دي.»
هغه دغهراز په ۲۰۲۴ زېږدیز کال کې هېواد ته د څه باندې دوه مېلیونه افغانانو راستنېدو ته نغوته وکړه او ویې ویل، چې د دغه بهیر مدیریت به د هېواد پر وضعیت خورا ډېر اغېز ولري.
د کډوالو په چارو کې د ملګرو ملتونو سازمان استازي زیاته کړه:«یوازې په ۲۰۲۴ زېږدیز کال کې دوه اعشاریه یو مېلیون افغانان بېرته خپل هېواد ته راستانه شوي او تمه ده، چې دا بهیر په ۲۰۲۵ کال کې هم دوام ومومي. د دغو خلکو د راستنېدو مدیریت کولای شي د پایېدونکي سولهییز وضعیت او یا د ګډوډۍ د وضعیت ترمنځ توپیر رامنځته کړي.»
په دغو مراسمو کې په افغانستان کې د جاپان سفیر تاکایوشي کرومایا هم له افغانانو د ملاتړ په برخه کې پر خپلې ژمنتیا ټینګار وکړ.
هغه په دې هکله زیاته کړه:«د جاپان حکومت د افغانستان له حکومته په ځانګړې توګه د کرنیزو او ټولنیز محوره بېخبنايي پروژو له لارې، چې پایېدونکې او پراخې دي او د ښځو لپاره فرصتونه برابروي، خپل ملاتړ ته ژمن دی.»
د کډوالو په چارو کې د ملګرو ملتونو د عالي کمېشنرۍ د راپورونو له مخې، جاپان له ۲۰۲۱ کال راهیسې په افغانستان کې د ملګرو ملتونو له دغه بنسټ سره نږدې دېرش مېلیون ډالره مرسته کړې ده.
