دید خبرې آژانس: رویټرز راپور ورکړی چې میانمار کې د تېرې ورځې زلزلې له امله د مړو شویو کسانو شمېر نږدې ۷۰۰ ته پورته شوی دی.
دغه زلزله کې د ټپیانو شمېر هم له ۱۶ سوو لوړ شوی دی.
راپور کې راغلي چې د ژغورنې د عملیاتو سره هم مهاله دغه هېواد ته نړۍوالې مرستې هم را روانې دي.
میانمار کې د واکمن پوځي ګوند مشر له ټولو هېوادونو د مرستې غوښتنه کړې ده.
له چین څخه د ژغورنې ډلې میانمار ته رسېدلي، روسیې ویلي، مرستې یې لیږلي او امریکا هم د مرستو ژمنه کړې ده.
په ورته مهال د امریکا د ځمک پېژندنې مرکز خبرداری ورکړی چې دغه پېښه کې به د مړو شویو کسانو شمېر لس زرو ته پورته شي او د مالي زیانونو ارزښت به د دغه هېواد له نا خالصو کورنیو تولیداتو لوړ وي.
د ریښتر په کچه دغه ۷.۷ درجې زلزله تېره ورځ (جمعه) رامنځته شوه چې ډېری زیانونه د میانمار په دویم ستر ښار مانډالې کې خلکو ته اوښتي دي.
د دغې زلزلې له امله د میانمار سربېره، چین او تایلنډ کې هم ګڼې ودانۍ او سړکونه ویجاړ شوي دي.
