مولوی عبدالکبیر د اهل تشيع له مشرانو او ديني عالمانو سره کتلي دي
دید خبرې آژانس: د اسلامی امارت د کډوالو او راستنېدونکو چارو وزارت سرپرست مولوي عبدالکبیر د کور او ښار جوړولو وزارت له مرستیال مدار علي کریمي بامیاني او د اهل تشیع هېوادوالو له مشرانو او ديني عالمانو سره کتلي دي.
ياد وزارت د يوې خبرپاڼې په خپرولو سره ويلي چې په دې کتنه کې د اهل تشیع مشرانو د اسلامي امارت له همکاریو یادونه وکړه او زیاته یې کړه، چې د حکومت له لوري پر وخت د ولس غږ اورېدل شوی او د امکان تر بریده یې ستونزې حل شوې دي.
د سرچينې د مالوماتو له مخې دغو مخورو او ديني عالمانو د یو لړ موضوعاتو اړوند خپلې سلا مشورې او نظرونه له سرپرست وزیر سره شریک کړل او همدارنګه په ځینو برخو کې یې د اسلامي امارت د همکارۍ غوښتونکي شول.
په ورته وخت کې مولوي عبدالکبير يادو قومي مشرانو او دیني عالمانو ته ويلي، چې اسلامي امارت د اسلامي نظام په توګه ولس ته د خدمت مسوولیت لري.
نوموړي همدارنګه له اسلامي امارت سره د اهل تشیع عالمانو او قومي مشرانو له همکاریو په ستاینې سره، د نظام د قوت او یووالي په برخه کې د هغوی د هڅو ملاتړ کړی.
د کډوالو او را ستنېدونکو چارو وزارت سرپرست په دغه کتنه کې د اهل تشيع مشرانو ته د هر راز همکارۍ ډاډ ورکړ.
