مولوي کبير: ا.ا د ولسونو هوساینې ته ژمن دی
دید خبرې آژانس: د ا.ا د کډوالو او راستنېدونکو چارو وزارت سرپرست مولوي عبدالکبیر، د بغلان د اندرابونو درېيو ولسوالیو له یو شمېر قومي مشرانو او مخورو سره کتلي دي.
په دې کتنه كې د اندرابونو قومي مشرانو او مخورو، په سيمه کې د سراسري امنیت راتګ او د فساد او زورواکیو له منځه تللو ستاینه کړې او د خلکو د هوساینې او اقتصادي اړتیاوو په اړه يې خپل نظرونه څرګند کړي دي.
هغوی ویلي چې د اندراب ولسونه د اسلامي امارت پر حاکمیت خوښ دي او اوسنی امنیت یې د سکون سبب ګرځېدلی دی او په وينا يې، خلک کولی شي په ډاډه زړه د هېواد هر ګوت ته سفر وکړي.
يادو مشرانو د مغرضو کړیو هغه تبلیغات رد کړي چې د اسلامي نظام پر وړاندې ترسره کېږي او ټینګار یې کړی چې د اندرابونو ولسونه به هېچاته د اسلامي نظام پر ضد منفي عمل ته پرې نه ږدي.
د کډوالو او راستنېدونکو چارو وزارت سرپرست هم د قومي مشرانو له څرګندونو او ملاتړ مننه کړې او ويلي يې دي چې اسلامي امارت د ولسونو هوساینې ته ژمن دی، د خلکو ستونزې درک کوي او هڅه کوي چې هره سیمه کې عدالت، امنیت او اقتصادي پرمختګ ته زمینه برابره شي.
د کتنې په پای کې د اندرابونو د خلکو ستونزې او اړتیاوې هم مطرح شوې چې د کډوالو او راستنېدونکو چارو وزارت سرپرست یې د حل لپاره د همکارۍ ډاډ ورکړی دی.
