مولوي حنفي له ګاونډیو هېوادونو د ۸۰۰ زره افغان کډوالو د جبري راستنېدو اعلان وکړ
د دید خبري آژانس د خبر له مخې، په داسې حال کې له پاکستانه د افغان کډوالو د جبري اخراج لړۍ دوام لري، د رییس الوزرا اداري مرستیال مولوي عبدالسلام حنفي وايي، له ګاونډیو هېوادونو څه باندې ۸۰۰ زره کډوال په زوره ایستل شوي دي.
ښاغلي حنفي په کابل کې په یولړ مراسمو کې وویل چې دوی د راستنیدونکو د «ستونزې په اداره کولو» بریالي شوي او هرې کورنۍ ته یې لس زره افغانۍ نغدي مرسته کړې ده.
مولوي حنفي دغه څرګندونې پرون په افغانستان د پخواني شوروي اتحاد د سرو لښکرو د يرغل د ٤٤مې کليزې د نمانځنې په مراسمو کې وکړې.
هغه پرته له دې چې کوم مشخص هیواد ته اشاره وکړي وویل: «۸۰۰ زره کډوال په زور له ګاونډیو هیوادونو څخه د ټولو منل شویو نړیوالو نورمونو او د ګاونډیو د حقوقو خلاف په زور ایستل شوي دي».
په داسې حال کې چې نړیوال سازمانونه افغانستان ته د اخراج شویو مهاجرینو د سختو شرایطو په اړه خبرداری ورکوي، په ځانګړې توګه د ژمي په موسم کې، ښاغلي حنفي وویل چې طا-لبانو د یوه کمیسیون په جوړولو سره دا ستونزه په ښه توګه اداره کړې ده.
د لومړي وزير د مرستيال په وينا، دغه کمېسيون به راستنېدونکو ته په موقتي کمپونو کې د اوسېدو له لارې خوراکي او روغتيايي خدمات برابروي او هرې کورنۍ ته به لس زره افغانۍ نغدې پيسې ورکوي.
د مولوي حنفي لخوا چمتو شوي احصایې شاید په تیرو دوو کلونو کې د مهاجرینو ټول راستنیدل شامل وي.
د روان کال له نومبر میاشتې راهیسې، چې شاوخوا دوه میاشتې وړاندې پاکستان د هغو افغانانو د جبري شړلو لړۍ پیل کړه، چې په دغه هېواد کې د اوسېدو اسناد نه لري.
ملګرو ملتونو ویلي، چې تر دې مهاله له پاکستانه څه باندې ۴۵۰ زره افغانان شړل شوي، چې ډېری یې د دواړو هېوادونو پولو ته څېرمه په موقتي کمپونو کې په سختو شرایطو کې ژوند کوي.
په دې وروستیو کې د روغتیا وزارت یوه جګپوړي چارواکي له نړیوالو سازمانونو غوښتي چې له بهر څخه د ایستل شویو مهاجرو د خرابو روغتیايي وضعیت په اړه مرسته وکړي.
پاکستان په پام کې لري چې تر ۱.۷ میلیونو ډېر افغانان چې په دغه هېواد کې د اوسېدو جواز نه لري، بېرته اخراج کړي.
