دید خبري آژانس: ملګري ملتونه وايي، په ۲۰۲۲ کال کې شاوخوا شپږ میلیونه افغانان په زوره بې ځایه شوي دي.
د کډوالو په چارو کې د ملګرو ملتونو عالي کمېشنرۍ اعلان کړی، چې په ۲۰۲۲ کال کې په نړۍ کې د ۱۰۸،۴ میلیونو په زوره بې ځایه شویو کسانو کې ۵،۷ میلیونه افغانان دي.
د ملګرو ملتونو په وینا دغه کسان د جګړې او تاوتریخوالي، د بشري حقونو د سرغړونو او ځورونو له امله په زوره بې ځایه شوي دي.
د دغه سازمان د شمېرو له مخې، په ټوله نړۍ کې د کډوالو شمېر په ۲۰۲۱ کال کې له ۲۷،۱ میلیونو څخه د ۲۰۲۲ کال تر پایه ۳۵،۵ میلیونو ته لوړ شوی چې د کډوالو تر ټولو لوی زیاتوالی ښيي.
د ملګرو ملتونو په وینا، په سلو کې ۵۲ ټول کډوال او نور خلک چې نړیوال ملاتړ ته اړتیا لري د دریو هیوادونو څخه راځي چې په ترتیب سره سوریه، اوکراین او افغانستان دي.
دا په داسې حال کې ده چې په هېواد کې د ښځو او نجونو پر وړاندې بندیزونه ورځ تر بلې زیاتېږي او وضعیت لاپسې خراب شوی دی.
