ملي دفاع وزارت: په ننګرهار کې مو بریالي عملیات درلودل
چارواکي وايي چې په ننګرهار ولايت کې د روانو عملياتو په ترڅ کې د يو شمېر بهرنيانو په ګډون د داعش ١٩ وسله وال وژل شوي دي.
د ملي دفاع وزارت وياند تورن جنرال دولت وزيرى وايي چې داعش وسله والو ته دغه مرګ ژوبله په تېرو ٢٤ ساعتونو کې د ننګرهار ولايت په پچير اګام ولسوالۍ کې اوښتې ده.
سرچينې زياته کړې چې په ننګرهار او کونړ ولايتونو کې ١٩ داعش وسله وال وژل شوي دي.
د وزيري په وينا، د کونړ په وټه پور ولسوالۍ کې په وژل شوو داعشيانو کې د هغه د جلب و جذب مسوول مولوي ضياء الله، د تبليغاتو مسوول احمد سعيد او درې نور مهم مشران شامل دي.
بلخوا د ننګرهار د والي وياند عطاءالله خوږياڼى وايي چې د پچيراګام ولسوالۍ سليمانخېلو تنګي، الف خېلو او مرخانې سيمو کې له پرون راهيسې ١٩ داعش وسله وال وژل شوي .
د هغه د معلوماتو له مخې، په وژل شوو داعشيانو کې پاکستاني اتباع هم شامل دي.
د عملياتو پر مهال افغان ځواکونو ته کوم زيان نه دی.
داعش ډلې تر اوسه په دې اړه څه نه دي ويلي.
