ډید خبري اژانس: د طا-لبانو د دفاع وزیر ملا محمد یعقوب مجاهد اعلان کړی، که څوک د جهاد په نیت له افغانستانه بهر شي، د هغه کار جهاد نه بلل کېږي.
مجاهد ټینګار کړی چې «کله چې امیر مجاهدین له جګړې منع کړي او بیا هم جګړې ته ولاړ شي، دې جګړې ته جهاد نه ویل کیږي».
ملا یعقوب دغه خبره په یوه غږیز فایل کې چې پرون (شنبه، د اسد ۱۴مه) خپره شوه، کړې ده.
په دې صوتی فایل کې مجاهد طا-لب جنګیالي له افغانستان څخه بهر د جهاد لپاره له تګ څخه منع کوي او هغوی هڅوي چې په هیواد کې دننه د طا-لبانو د رژیم ملاتړ وکړي.
ښاغلی مجاهد وايي چې پرمختللو علماوو او تصنیفو کتابونو په دې اړه څرګندونې کړې دي چې کله «امیر مجاهدین له جګړې څخه منع کوي، د هغوی کار جهاد نه بلل کیږي».
هغه ټینګار کوي چې د طا-لبانو غړي باید داسې عمل ونه کړي چې د دوی شل کلنې «لاسته راوړنې» ته زیان ورسوي.
د ملا یعقوب مجاهد دا څرګندونې په داسې حال کې کېږي چې پاکستان په دې وروستیو کې د پاکستان د ناامنیو پړه پر افغانستان اچولې ده.
