ملابرادر له ترکانو وغوښتل چې په افغانستان کې پانګونه وکړي
ډيډ خبري اژانس: د لومړي وزير اقتصادي مرستيال ملا عبدالغني برادر ترکيې ته د خپل سفر پر مهال ويلي، چې په افغانستان کې د پانګونې فرصتونه شته او له ترکانو يې وغوښتل، چې په افغانستان کې پانګونه وکړي.
د لومړي وزیر اقتصادي مرستیال ملا برادر ترکیې ته د خپل سفر په ترڅ کې د دغه هېواد د سوداګرۍ خونې له رئیس او یو شمېر سوداګرو سره وکتل.
په دې کتنه کې ملا برادر په اقتصادي، سوداګریزو مسایلو او په افغانستان کې د پانګونې د فرصتونو په رامنځته کولو خبرې وکړې.
د ملابرادر د دفتر د معلوماتو له مخې، په دې ناسته کې ټینګار وشو چې اوسمهال په افغانستان کې د کرنې، انرژۍ تولید، زیربناوو، صنعت، مخابراتو او نورو برخو کې د پانګونې لپاره ښه زمینه برابره ده.
د افغانستان د سوداګرۍ او صنایعو خونې د مدیره پلاوي غړي خانجان الکوزي وویل: په دې غونډه کې د ترکیې سوداګرو په ځانګړې توګه د برېښنا، کانونو، کرنې، ساختماني او روغتیا په برخو کې د پانګونې په اړه خوښي څرګنده کړه.
په همدې حال کې یو شمېر سوداګر وايي چې د سوداګرۍ د ودې او د صادراتو د زیاتوالي لپاره باید د افغانستان او ترکیې ترمنځ د سوداګرۍ ستونزې هوارې شي.
تېره اوونۍ د طا-لبانو د لومړي وزير مرستيال د اقتصادي او سياسي اړيکو د پراختيا په موخه له يوه لوړ پوړي دولتي پلاوي سره ترکيې ته سفر وکړ او د دغه سفر په ترڅ کې به له بېلابېلو ترکي چارواکو سره ليدنې او خبرې اترې وکړي.
