مجاهد: د رسمیت پېژندنې لپاره زمونږ هڅې دوام لري
دید خبرې آژانس: د اسلامي امارت ویاند ذبیحالله مجاهد له نړۍوالې ټولنې سره د افغانستان د اړیکو په احیا کې د ملګرو ملتونو رول مهم ګني.
ښاغلی مجاهد وايي، چې د رسمیت پېژندلو لپاره د اسلامي امارت له لوري هڅې شوي؛ خو روښانه نهده چې په روان لمریز کال کې نړۍ سرپرست حکومت په رسمیت پېژني او که نه.
نوموړي همدارنګه ویلي، چې ملګرو ملتونه باید له هېوادونو سره د اسلامي امارت د اړیکو د پراختیا او د هغوی له لوري د سرپرست حکومت د رسمیت پېژندنې لپاره کار وکړي.
د اسلامي امارت ویاند په دې هکله طلوعنیوز ته وايي:«خو بیا هم د دوی دنده ده، چې د افغانستان او نړۍ، په ځانګړې توګه د ملګرو ملتونو، د اړیکو په بیارغونه کې اساسي ګامونه واخلي او دې اړیکو ته ارزښت ورکړي. افغانستان د نړۍ او ملګرو ملتونو لپاره یو مهم هېواد دی، او همداراز، د دوی دا دریځ د افغانستان د خلکو حقونه تر پښو لاندې کوي، هغوی باید یو غوره دریځ خپل کړي.»
د یوه ټولګډوني حکومت جوړېدل، د بشري حقونو خونديتوب په ځانګړې توګه د ښځو او نجونو د حقونو خوندیتوب، د ملي ډيالوګ پیلېدل او له ترهګرۍ او نشهيي توکو سره مبارزه هغه شرایط دي، چې د شنونکو په وینا، له مخې یې نړۍ تر اوسه اسلامي امارت په رسمیت نهدی پېژندلی.
که څه هم، څه باندې درې نیم کاله کېږي، چې اسلامي امارت پر افغانستان واکمن شوی؛ خو په دې موده کې یې له ایران، چین، ترکیې، قطر، ازبیکستان، او ځینو نورو هېوادونو سره ډیپلوماتیکې اړیکې ټینګې کړې دي؛ خو تر اوسه هېڅ هېواد اسلامي امارت په رسمیت نهدی پېژندلی.
