مجاهد: افغانستان د رېل پټلۍ له لارې په نړۍوال سوداګریز مرکز بدلیږې
دید خبرې آژانس: د اسلامي امارت ویاند ذبیحالله مجاهد وایي افغانستان به د رېل پټلۍ له لارې په نړۍوال سوداګریز مرکز بدل شي.
ښاغلي مجاهد د کندهار- هرات د ۷۳۷ کيلومټر رېل پټلۍ د سروې او ډيزاین چارو د پېل پر مهال ویلي، چې د دغې رېل پټلۍ له جوړېدو سره به د صادراتو او واردتو په برخه کې د اسانتیاو ترڅنګ سوداګري وده وکړي، د توکو بيې به ټيټي شي او کاري فرصتونه به زيات شي.
د اسلامی امارت ویاند وايي:«د رېل پټلۍ جوړېدو سره زموږ اقتصاد پياوړی کېږي، زموږ سوداګرۍ ورسره پياوړې کېږي او زموږ اقتصاد ورسره په پښو درېږي. کله چې دغه او نورې سترې پروژې بشپړې شي، زه تاسو ته باور درکوم، چې د افغانستان څلوېښت مېلیونه خلک به پر ځان بسيا شي او نور به دغه هېواد ته هېڅوک به بده سترګه ونهشي کتلای.»
د کندهار- هرات د ۷۳۷ کيلومتره رېل پټلۍ د سروې او ډيزاين چاري به د درېيو کورنیو شرکتونو له لوري د ۸ مياشتو په موده د ۲۶۴ مېلیونه افغانيو په ارزښت بشپړې شي.
د ټولګټو چارو وزارت د رېل پټلۍ مرستيال محمد اسحاق صاحبزاده وايي:«پر پنځه لاټه مو د دغه پروژې رغنيزې چارې وېشلې دي، چې تورغندۍ -هرات، هرات-شینډنډ، شینډنډ – فراه، فراه – لښکرګاه، لښکرګاه – کندهار، کندهار- سپين بولدک، هرات – نيمرز او له ايران سره موږ د خواف له لارې وصلېږي، چې دغه به يې لارې وي.»
د پروژې انجينر جلات خان ابراهيمي طلوعنیوز ته وویل:«د ټولګټو چارو وزارت له لارې د ۲۶۴ مېلیونه افغانيو په ارزښت به د اتو مياشتو په موده کې د وزارت د مشخصاتو پر بنسټ د دغه پروژې چارې بشپړې او ګټې اخستنې ته وسپارل شي.»
د کندهار د سوداګرۍ او پانګوني مسوولان وایي، د رېل پټلۍ غځېدو سره به افغانستان کې پانګونه زياته او سوداګرۍ به وده وکړي.
د کندهار د سوداګرۍ او پانګونې خونې رییس محمد صديق مهمند په دې هکله څرګندوي:«مخکې پر خصوصي سکټور زيات باور شتون نهدرلود او زياتې پروژې به بهرنیو شرکتونو ته ورکول کېدلې؛ خو له نيکهمرغه اوس دغه چاره په خپله کورني شرکتونه مخته وړي او دا له خصوصي سکټوره د اسلامي امارت ملاتړ څرګندوي.»
د کندهار د وچې مېوې ټولنې مسوول عبدالاحد صديقي وايي:«دا يو حقيقت دی، چې د رېل ګاډي د لين نشت له امله د نړۍ په غريبو هېوادونو کې شمېرل شوي وو؛ خو که دغه رېل پټلۍ جوړه شي، موږ به د صادراتو او وارداتو برخه کې پرمختګ وکړو او د پرديو له احتياجه به وژغورل شو.»
د مسوولانو په خبره د هرات – کندهار د رېل پټلۍ د سروې او ډيزاین چارو پایته رسېدو وروسته به د رېل پټلۍ د رغنيزو چارو پروژه په پنځو لاټونو کې پېلوي، چې د هرات د خواف له لارې به له ایران سره وصل شي.
