مجاهد؛ د افغانستان خاوره د هېڅ هېواد پر ضد نه کارول کیږی
دید خبرې آژانس: د کار د ملي کنفرانس په وروستۍ ورځ د اسلامي امارت ځينو چارواکو یوځل بیا اعلان وکړ چې، د افغانستان خاوره به د هېڅ هېواد پر ضد ونهکارول شي.
په دې غونډه کې د ملي دفاع او کورنیو چارو وزارتونو سرپرستانو هم په ډاګه کړه چې، دوی د هېواد د امنیت مسوولیت لري او په وینا یې په هېواد کې د مخالفو ډلو فعالیتونه هم شنډ کړای شوي دي.
د دفاع وزارت سرپرست محمد یعقوب مجاهد وویل:«موږ شپه او ورځ پر دې باندې کار کوو چې، د هېواد هر وګړي ته په هر قیمت چې، وي امنیت تامین کړو، دفاع ورڅخه وکړو عزت یې وساتو، د مال، اولاد او د ناموس حفاظت یې وکړو.»
ورته مهال، د رييس الوزرا اداري مرستیال مولوي عبدالسلام حنفي په دغې غونډه کې د خپلې وینا په یوې برخه کې ګاونډیو هېوادونو ته یوځل بیا ډاډ ورکړ چې، افغان خاوره به د هېڅ هېواد پر ضد ونهکارول شي.
ښاغلي حنفي وايي:«د اسلامي امارت له واکمنۍ وروسته، د افغانستان خاوره د هېڅ هېواد پر ضد نهده کارول شوې او موږ له ټولو ګاونډيانو، د سیمې او نړۍ له هېوادونو سره د متقابل درناوي پر بنسټ تعامل او ښې اړیکې غواړو.»
د کورنیو چارو وزارت سرپرست خلیفه سراجالدین حقاني هم د خپلې وینا په یوې برخه کې ویلي چې، دا/عش یې په افغانستان کې لهمنځه وړی او له کمو امکاناتو سره یې د هېواد امنیت تامین کړی دی.
د کورنیو چارو وزارت سرپرست په دې هکله څرګنده کړه:«د دوی خو یوازېنۍ تشویش دلته دا وو چې، افغانستان زموږ لپاره یو ګواښ دی، یوه ستونزه ده، نن خو الحمدالله هغه تشویش او تهدید هم نشته، دله چې، څومره د مغرضینو او مفسدینو چې موږ په یوې اصطلاح ورته خوارج او یا باغیان وايي د هغوی ځالې په بشپړه توګه لهمنځه تللي دي.»
د ویلو ده چې، د کار د ملي کنفرانس په لومړۍ ورځ غونډه کې د بهرنیو چارو وزارت سرپرست پر ګاونډیو او د نړۍ په نورو هېوادونو له نیوکو سره وویل، هغوی تل د اسلامي امارت له لوري د ترهګرۍ او د نشهيي توکو پر وړاندې پر مبارزې ټینګار کوي؛ خو په دغو برخو کې یې تر اوسه له اسلامي امارت سره هېڅ ډول همکاري نهده کړې.
