دید خبرې آژانس: د اسلامي امارت د بهرنيو چارو وزارت سرپرست مولوي امير خان متقي د بنديانو په چارو کې د امريکا متحده ايالتونو د ولسمشر له ځانګړي استازي اډم بوايلر او د افغانستان لپاره د دغه هېواد له پخواني ځانګړي استازي زلمي خليلزاد او مل پلاوي سره وکتل.
ياد وزارت په يوه خبرپانه کې ويلي چې په دې کتنه کې د افغانستان او امریکا پر دوه اړخيزو اړيکو، د بنديانو په خلاصون او په امريکا کې افغانانو ته د کونسلي خدمتونو وړاندې کولو په اړه خبرې شوې دي.
د بهرنيو چارو وزارت سرپرست کابل ته د ياد پلاوي راتګ دوه اړخيزو اړيکو کې ښه پرمختګ بللی دی.
ښاغلي متقي څرګنده کړې، چې اسلامي امارت د خپل متوازن بهرني سياست په رڼا کې له ټولو لوريو سره مثبتې اړيکې غواړي.
هغه زياته کړې، دا مهمه ده، چې افغانستان او امریکا پر دې وتوانېږي چې مسئلې د خبرو له لارې حل کړي.
د بهرنيو چارو وزارت سرپرست همدارنګه ويلي؛ پکار ده چې دواړه هېوادونه د شل کلنې جګړې له اغېزو راووځي او يو بل سره سياسي او اقتصادي مثبتې اړيکې ولري.
په ورته وخت کې د بنديانو په چارو کې د امريکا د ولسمشر ځانګړي استازي اډم بوايلر په دغه کتنه کې د افغانستان او امريکا ترمنځ د بنديانو په برخه کې پرمختګ د باورجوړونې پر لور ښه ګام بللی دی.
هغه په افغانستان کې د نشه یي توکو پرخلاف او د امنيت د ټينګښت پر لور اقدامات د ستاينې وړ بللي دي.
بوايلر د دواړو لوريو ترمنځ د خبرو پر دوام ټينعار کړی او د خبرو له لارې يې د اړيکو ټينګښت مهم بللی دی.
نوموړي څرګنده کړې، چې دواړه هېوادونه تاريخي اړيکې لري، چې ځينو پړاوونو کې ستونزې هم وې، خو اوس مهمه دا ده، چې راتلونکی په پام کې ونيول شي.
