د دید خبری آژانس د خبر له مخې، یو شمېر سرپرست وزیرانو په هرات کې په یوه غونډه کې د حکومتدارۍ، د برېښنا په برخه کې د پانګونې، د سړک جوړولو او کانونو په اړه خبرې وکړې. په دې کتنه کې امیرخان متقي، سرپرست حکومت ټول شموله وباله.
د بهرنیو چارو وزارت سرپرست مولوي امیرخان متقي وویل: سوداګریز بندرونه فعال دي، د هېواد پولي ارزښت لوړ شوی او په سلګونو پرمختیايي او اقتصادي پروژو کار روان دی.
متقي همداراز زیاتوي، چې له بېکارۍ سره د مبارزې په موخه تر یو میلیون ډېر کسان په دفترونو او زرګونه کسانو ته په خصوصي سکتور کې د کار زمینه برابره شوې ده.
د هغه په وينا، د شوروي د جګړو پر مهال ټول تاسيسات ويجاړ شول، عامه شتمنۍ لوټ شوې او په زرګونو خلک په ډله ييزه توګه ووژل شول، خو د هغوى له بريا سره سم عمومي عفوه اعلان شوه او ټول قومونه او مذهبونه په کابينه او حکومت کې شتون لري. ټول شموله ده.
مولوي متقي په دوام کې وايي، چې په تېر حکومت کې ناامني، اعتياد او د نشه يي توکو قاچاق، هر ډول فساد خپل اوج ته رسېدلى و او اوس په دې برخو کې بنسټيز کارونه شوي دي.
متقي د ټاپي پروژې په اړه وايي چې د دې پروژې د پيل لپاره هوکړه ليکونه شوي دي.
په همدې حال کې د کانونو او پټرولیم وزارت سرپرست شهاب الدین دلاور وايي، په تېرو دوو کلونو کې د غوریانو د اوسپنې د کان څلور بلاکونه چې ۹۵۰ کیلومتره مربع مساحت لري، پانګونه شوې او زرګونه ټنه پیسې پرې لګېدلي دي. په هغې کې پانګونه کړې.
د کانونو او پټرولیم وزارت سرپرست هم د ټاپي پروژې عملي کېدل د هېواد د اقتصاد په وده کې اغېزمن وبلل او ټینګار یې وکړ چې په زرګونو کسانو ته به د کار زمینه برابره شي پرته له دې چې نورو هېوادونو ته د کار لپاره لاړ شي.
نوموړی همدا راز زیاتوي، چې د دې ولایت د سرې او احتمالي عوایدو له لارې به د هرات – غور لویه لاره شاوخوا ۳۵۰ کیلومتره پاخه شي او پر دې سربېره به د بادغیس ولایت لاره هم جوړه شي.
دلاور دغه راز وويل، د هرات فارياب لاره چې د هېواد له حلقوي سړک څخه شمېرل کېږي، شاوخوا ١٧٠ کيلومتره اوږدوالى لري او ډېر ژر به يې چارې بشپړې شي، چې د يادو رغنيزو پروژو په پلي کېدو سره به هرات په يوه لوړ مقام کې راولي.
د يادونې وړ ده، چې په دغه خبري کنفرانس کې د بهرنيو چارو، کانونو او پټروليم پر سرپرستو وزيرانو سربېره د صنعت او سوداګرۍ وزارت سرپرست نورالدين عزيزی او د اورګاډي پټلۍ رييس بخت الرحمن شرافت هم حضور درلود.
