دید خبرې آژانس: د هندوستان د بهرنیو چارو وزارت ځانګړي استازي او د افغانستان، ایران او پاکستان د څانګې عمومي رئیس انند پرکاش د افغانستان اسلامي امارت بهرنیو چارو له وزیر مولوي امیرخان متقي سره وکتل.
د بهرنيو چارو وزارت د يوې خبرپاڼې په خپرولو سره ليکلي چې په دې کتنه کې د دواړو هېوادونو تر منځ پر دوه اړخیزو سیاسي اړیکو، سوداګرۍ، ټرانزیټ او وروستیو سیمهییزو سیاسي حالاتو په تړاو خبرې شوې.
مولوي امیرخان متقي د دواړو هیوادونو تر منځ د ډيپلوماتیکو او اقتصادي اړیکو پر پراختیا ټینګار کړی او ويلي يې دي، چې په افغانستان کې اوسمهال د پانګونې لپاره ښه فرصتونه برابر دي او هندي پانګوال دې له دغه فرصتونو څخه په استفادې په افغانستان کې پانګونه وکړي.
ښاغلي متقي همدارنګه ويلي چې د افغانستان او هندوستان تر منځ د خلکو تګ راتګ په برخه کې باید اسانتیاوې رامنځته شي او د سوداګرو په ګډون دې ناروغانو او محصلینو ته د ویزو ورکړه عادي حالت ته راوګرځول شي.
په ورته وخت کې انند پرکاش ويلي چې هېواد ته یې له افغانستان سره اړیکې مهمې دي او هیله مند دی، چې په مختلفو برخو کې اړیکې نورې هم پراخې کړي.
نوموړي زياته کړې، چې هند به له افغانستان سره خپلو همکاریو ته دوام ورکوي او غواړي، چې په ځینو بنسټيزو پروژو کې هم پانګونه وکړي او هغه پروژې چې د څه مودې راهیسې ولاړې دي، چارې يي بېرته پیل کړي.
د يادونې وړ ده، چې دواړو لورو په دغه کتنه کې د اړیکو پر پراختیا د پلاوو پر تګ راتګ او د ویزو په برخه کې په اسانتیاوو راوستلو او دوه اړخیزو همکاریو هم ټینګار کړی.