دید خبرې آژانس: د افغانستان لپاره د پاکستان ځانګړي استازي محمد صادق کابل ته په خپل سفر کې، د بهرنیو چارو وزارت له سرپرست امیرخان متقي سره، د کابل او اسلاماباد ترمنځ د اړیکو په هکله خبرې اترې کړې دي.
د بهرنیو چارو وزارت سرپرست امیر خان متقي ټینګار کړی، چې د سوداګرۍ او ټرانزیټ پر وړاندې خنډونه د هېڅ لوري په ګټه نه دي او ځینې مسایل باید له یو بل سره ونه تړل شي.
د دواړو هېوادونو د سوداګرۍ او ټرانزیټ په برخه کې د شته ستونزو د حل لپاره د عملي ګامونو پورته کول، د دغې کتنې بله موضوع وه.
د بهرنیو چارو وزارت د عامه اړیکو رییس ضیااحمد تکل په دې هکله وايي:«د هېواد د بهرنیو چارو وزیر پاکستاني لوري ته یاده کړه، چې په ټرانزیټي لارو او تجارتي برخو کې خنډونه د هېڅ لوري په ګټه نهدي او ټینګار یې وکړ، چې په کار ده دا مسایل له یو بل سره ونهتړل شي.»
د افغان کډوالو تدریجي او باعزته راستنېدل د دواړو لورو ترمنځ د بحث یوه بله مهمه موضوع وه. د پاکستان ځانګړي استازي هم د افغانستان امنیت د پاکستان او سیمې په ګټه بللی او ژمنه یې کړې، چې د افغانانو لپاره به د وېزې د ورکړې په بهیر کې اسانتیاوې رامنځته شي.
د ډېورنډ فرضې کرښې په اوږدو کې نښتې، د پکتیکا ولایت پر ځينو برخو د پاکستان هوایي بریدونه او له پاکستانه د افغان کډوالو ایستل هغه مهم مسایل دي، چې په تېر یو کال کې یې د دواړو لورو اړیکې ترینګلې کړې دي.
