دید خبرې آژانس: د بهرنیو چارو وزارت سرپرست مولوي امیرخان متقي په خپل کاري دفتر کې د سره صليب نړيوالې کمېټې له عمومي رئيس پير کراهنبول سره کتلي دي.
یاد وزارت د یوې خبرپاڼې په خپرولو سره ویلي چې د سره صليب نړيوالې کمېټې عمومي رئيس په دغه کتنه کې په افغانستان کې د روغتيا، مصنوعي غړو جوړولو او نورو بشري برخو کې د سره صليب نړيوالې کمېټې پر فعاليتونو رڼا اچولې او په افغانستان کې د راغلي امنيت او ثبات څخه يې خوښي څرګنده کړې ده.
سرچینې زیاته کړې، چې د بهرنيو چارو وزارت سرپرست په دغه کتنه کې د لسيزو په اوږدو کې د افغانستان له مظلومې طبقې (ناروغانو او معلوليت لرونکو کسانو) سره د سره صليب نړيوالې کمېټې مرستې د هغوی له پاره د وياړ او د افغانانو له پاره د خوښۍ او مننې باعث بللې او غوښتنه يې کړې، چې د سره صليب نړيواله کمېټه په نورو هېوادونو کې د بندي افغانانو د برخليک معلومولو په برخه کې هم مرسته وکړي.
په ورته وخت کې د سره صلیب نړیوالې کمېټې عمومي رئيس په دغه کتنه کې ویلي چې که څه هم د ځينو هېوادونو له لوري زندانونو ته د دوی پر لاسرسي بنديز د بندي افغانانو د موندلو او کورنیو ته یې د احوال رسولو بشرپاله هڅه له خنډونو سره مخ کړې، خو دوی به په دې برخه کې خپلې هڅې نورې هم ګړندۍ کړي.
نوموړي همداراز وويل چې د دوی پرېکړې د نورو اړخونو له پرېکړو څخه مستقلې دي او په افغانستان کې به خپلو فعاليتونو ته د پخوا په څېر ادامه ور کړي.
