دید خبرې آژانس: د بهرنیو چارو وزارت سرپرست په کابل کې د جاپان له سفیر سره په کتنه کې د دوه اړخیزو اړیکو په تړاو خبرې وکړې.
د بهرنیو چارو وزارت سرپرست په کابل کې د جاپان له سفیر سره وکتل او د دواړو هېوادونو ترمنځ یې د سیاسي او اقتصادي اړیکو د پیاوړتیا په تړاو خبرې وکړې.
په کابل کې د جاپان سفیر د دوحې بهیر کاري ډلو ته اشاره وکړه او هیله یې څرګنده کړه چې د افغانستان او نړیوالې ټولنې ګډ کار به مثبتې پایلې ولري. نوموړي دغه راز د نشهیي توکو د کر او تولید پر وړاندې د اسلامي امارت مبارزه وستایله.
ښاغلي متقي ټینګار کړی چې اوسمهال په عمومي توګه د امنیت په ټينګښت سره، په افغانستان کې د پانګونې فرصتونه رامنځته شوي او جاپان کولای شي په لویو پروژو کې پانګونه وکړي.
دواړو لوریو دغه راز جاپان ته د اسلامي امارت د جګپوړي پلاوي سفر د دوه اړخیزو اړیکو د پراختیا لپاره یو مثبت ګام بللی او ویلي یې دي چې دا ډول تعاملات باید دوام ومومي، څو د دوهاړخیزو همکاریو لپاره عملي بدلونونه رامنځته شي.
که څه هم په وروستیو کې د سیمې او نړۍ له هېوادونو سره د اسلامي امارت تعاملات پراخ شوي او وخت ناوخته د اسلامي امارت چارواکي د بېلابېلو هېوادونو له استازو سره کتنې لرلي، خو تر اوسه هېڅ هېواد اسلامي امارت په رسميت نه دی پېژندلی.
